شہداء کا پاک خون ملت میں بیداری کا سبب بن رہا ہے، عظمت شہداء کانفرنس
آئی ایس او پشاور ڈویژن کے زیراہتمام منعقدہ کانفرنس سے خطاب کرتے ہوئے علامہ نذیر حسین نے کہا کہ دشمن اسلام کو اب سمجھ لینا چاہئے کہ یہ قافلہ شہادتوں سے رکنے کی بجائے منزل کی جانب اور تیزی سے بڑھے گا، ثاقب بنگش نے کہا کہ قوم اور ملت کے عظیم جانبازوں کی قربانیوں کو تاابد یاد کیا جائے گا۔
ہفتہ شہداء امامیہ کے سلسلے میں امامیہ اسٹوڈنٹس آرگنائزیشن پشاور ڈویژن کے زیراہتمام عظمت شہداء کانفرنس کا انعقاد کیا گیا، اس موقع پر مقررین کا کہنا تھا کہ شہداء کا پاک خون ملت میں بیداری کا سبب بن رہا ہے، قوم و ملت کو آگے بڑھ کر شہداء کے خانوادوں کا سہارا بننا ہوگا، مرکزی امام بارگاہ حسینیہ ہال پشاور میں منعقدہ کانفرنس میں شہداء کے ورثاء نے بھی شرکت کی، اس موقع پر اپنے خطاب میں امام جماعت امامیہ مسجد حیات آباد علامہ نذیر حسین نے شہداء کی عظمت پر روشنی ڈالی اور کہا کہ شہداء کے خانوداگان کی ضروریات، انکے بچوں کی پرورش اور تعلیم کا خیال رکھنا ہماری اولین ذمہ داری ہے، شہادت بہت بڑا درجہ ہے، شہید کبھی مرتا نہیں، وہ اللہ تعالٰی کے فرمان کے مطابق زندہ رہتا ہے۔
انہوں نے کہا کہ میں آج دشمنان اسلام کو یہ بتانا چاہتا ہوں کہ یہ قافلہ شہادتوں سے رکنے کی بجائے منزل کی جانب اور تیزی سے بڑھے گا۔ آئی ایس او پشاور ڈویژن کے صدر ثاقب بنگش نے اپنے خطاب میں کہا کہ شہداء کا پاک خون ملت میں بیداری کا سبب بن رہا ہے، قوم اور ملت کے عظیم جانبازوں کی قربانیوں کو تاابد یاد کیا جائے گا، کانفرنس سے شہداء کے بچوں نے بھی خطاب کیا اور شہادت کے بعد اپنے مسائل اور تکالیف کا ذکر کیا، جس سے شرکاء ِمحفل کی آنکھیں اشک بار ہو گئیں، آخر میں شہداء کے بچوں میں تحائف تقسیم کئے گئے اور گیاری سیکٹر میں برفانی تودے تلے پھنسے فوجی جوانوں کے لئے خصوصی دعا کی گئی۔
