ہندوستان: امریکی قونصل خانے کے باہر احتجاج

ہندوستان کی ریاست آندھراپردیش میں بائیں بازو کی جماعتوں کے طرفداروں نے امریکی قونصل خانے کے سامنے اجتماع کرکے نیویارک میں ہندوستان کی سفارتکار دیویانی کے ساتھ برتے جانے والے ناروا سلوک پر امریکہ کی جانب سے معافی مانگنے کے علاوہ آئندہ اس قسم کی حرکت نہ کرنے کی یقین دہانی کرائے جانے کا مطالبہ کیا۔ریاستی دارالحکومت حیدرآباد میں امریکی قونصل خانے کے سامنے کئے جانے والے اس اجتماع میں مظاہرین نے امریکہ مردہ باد کے نعرے لگائے اور امریکی پرچم کو پیروں تلے روندا۔امریکہ میں ہندوستانی سفارتکار کی گرفتاری اور اس کی بدن تلاشی کو لیکر ہندوستان میں تمام جماعتوں کی جانب سے شدید احتجاج کیا گيا ہے اور سرکاری سطح پر بھی نئی دہلی نے اپنے سخت ردعمل کا اظہار کیا ہے جس کے بعد امریکی وزیر خارجہ نے ہندوستانی وزیر خارجہ سے ٹیلیفون پر گفتگو کرنے کی کوشش کی اور پھر دستیاب نہ ہونے پر ہندوستان کے قومی سلامتی کے مشیر شیوشنکر مینن سے گفتگو کی اور اس بات کا یقین دلایا کہ امریکہ اس مسئلے کا پوری گہرائی سے جائزہ لے گا۔جان کیری نے امید ظاہر کی کہ اس مسئلے کی بناء پر ہندوستان اور امریکہ کے تعلقات متاثر نہیں ہوں گے۔قال ذکر ہے کہ امریکہ میں ہندوستان کی سفارتکار کے ساتھ پیش آنے والے اس معاملے پر ہندوستان کی لوک سبھا میں بھی کافی ہنگامہ ہوا ہے۔