عراق میں کار بم حملہ، کئی افراد ہلاک و زخمی

عراقی پولیس کے حوالے سے خبر دی ہے کہ بغداد کے شمال میں 70 کیلومیٹرکے فاصلے پر موجود تکریت شہر کے قریب گزشتہ شب ایک کار بم دھماکہ ہوا جس میں بارہ افراد ہلاک اور زخمی ہوگۓ ہیں۔ واقعے کی مزید تفصیلات حاصل نہیں ہو سکیں ہیں۔ عراق کی وزارت صحت کی تازہ ترین رپورٹ کے مطابق عراق میں اکتوبر کے مہینے میں دہشتگردانہ کارروائيوں میں نو سو چونسٹھ افراد ہلاک ہوچکے ہیں جبکہ 2003 سے اب تک عراق میں چار ہزار دہشتگردانہ حملے ہو چکے ہیں۔
اقوام متحدہ نے بھی اپنی رپورٹ میں کہا ہے کہ عراق کے متعدد علاقوں میں ہونے والے مختلف واقعات میں اکتوبر کے مہینے میں 979 افراد مارے گئے ہیں۔ رپورٹ میں کہا گیا ہے کہ مارے جانے والوں میں 852 عام شہری ہیں جبکہ 127 سیکورٹی اہلکار ہیں۔ رپورٹ میں اسی طرح کہا گیا ہے کہ 1793 افراد متعدد حملوں اور فائرنگ کے واقعات میں زخمی ہوئے ہیں۔