شہید نصراللہ کا پاکیزہ خون حزب اللہ کی سربلندی کا سرچشمہ ہے، سپاہ پاسداران

شیعیت نیوز : سپاہ پاسداران انقلاب اسلامی نے حزب اللہ لبنان کے سیکرٹری جنرل شہید سید حسن نصراللہ کی شہادت کی دوسری برسی کے موقع پر جاری اپنے اعلامیے میں کہا ہے کہ سید مقاومت کا راستہ ہمیشہ قائم رہے گا اور ان کا پاکیزہ خون مزاحمت کے پیکر میں اقتدار کے جوشاں چشمے اور حزب اللہ کی عزت و سربلندی کا سرچشمہ بن گیا ہے۔ بیان میں واضح کیا گیا کہ اس خونریز جرم کو دو سال گزر چکے ہیں جب مجرم غاصب صہیونی حکومت نے آزادی کے علمبردار کو ہم سے جدا کیا، لیکن دشمن کے شیطانی ارادے کے برخلاف ان کا پاکیزہ خون امر ہو کر مزاحمت کی نشوونما میں تبدیل ہو گیا ہے۔

سپاہ کے بیان کے مطابق سید حسن نصراللہ صرف ایک رہنما نہیں بلکہ جدید مزاحمت کے اسٹریٹجک معمار، میدان اور سفارت کاری کے ماہر اور خطے کی مزاحمتی اقوام کے ناقابل تسخیر تعلق کی عملی علامت تھے۔ انہوں نے مزاحمت کو ایک حکمت عملی سے نکال کر ایک فکری اور تمدنی نظام میں تبدیل کیا۔ ان کی شجاعت، فصاحت اور استقامت پر مبنی گفتگو دلوں کو روشن کرتی تھی اور ان کا اثر لبنان و فلسطین سے یمن، عراق، اور شام تک امت مسلمہ کے بیدار ضمیر کی آواز بن گیا تھا۔ ان کا پختہ یقین تھا کہ مزاحمت ایک متحد محاذ ہے اور ایک کی کامیابی سب کی کامیابی ہے۔

یہ بھی پڑھیں : آبنائے ہرمز پر ٹرمپ کے بیانات کھوکھلے؛ زمینی حقائق میڈیا وار سے نہیں بدلتے، ایرانی سکیورٹی عہدیدار

بیان میں مزید کہا گیا کہ شہید نصراللہ کا نام خطے کی معاصر تاریخ میں ایک ایسے نظریہ ساز کے طور پر یاد رکھا جائے گا جس نے غاصب صہیونی حکومت کے ناقابل شکست ہونے کے وہم کو خاک میں ملا دیا۔ ان کا یہ روشن راستہ لبنان کی اسلامی مزاحمت اور حزب اللہ کے مجاہدین، حجت الاسلام والمسلمین شیخ نعیم قاسم کی قیادت میں پوری عزت و اقتدار کے ساتھ جاری رکھیں گے۔ جنوبی لبنان میں مزاحمت کی تاریخی شجاعتوں نے غاصب صہیونی آبادکاروں میں نقل مکانی کے رجحان میں اضافہ کر کے اسرائیلی حکومت کے قریب الوقوع انہدام کی نوید سنا دی ہے۔

سپاہ پاسداران نے اپنے بیان کے اختتام پر امام خمینیؒ اور امام خامنہ ای، مقاومت کے شہداء بالخصوص سید حسن نصراللہ اور بریگیڈیئر جنرل عباس نیلفروشان کو خراج عقیدت پیش کیا۔ بیان میں آبنائے ہرمز پر مزاحمت کے مجاہدین کے کنٹرول کو اللہ کی نصرت پر یقین کا ثمر قرار دیتے ہوئے اس عزم کا اعادہ کیا گیا کہ مزاحمت کے محاذ کی حمایت، مستضعفین کے حقوق کا دفاع اور قدس شریف کی مکمل آزادی تک استقامت، سپاہ پاسداران اور ایران کی مسلح افواج کا دائمی اور قومی فریضہ ہے جسے آخری فتح تک جاری رکھا جائے گا۔