امریکی معیشت بحران کا شکار، کمپنیوں کے نجی قرضوں کے ڈیفالٹ میں خطرناک حد تک اضافہ

شیعیت نیوز : معروف ریٹنگ ایجنسی ‘فیچ’ (Fitch) کی تازہ ترین رپورٹ کے مطابق، گزشتہ 12 ماہ کے دوران امریکی کمپنیوں کے نجی قرضوں کے شعبے میں خطرناک حد تک اضافہ دیکھا گیا ہے، جس کے تحت تقریباً 6.3 فیصد قرضے عدم ادائیگی (ڈیفالٹ) کی حالت میں چلے گئے ہیں۔ اس کا واضح مطلب یہ ہے کہ قرض لینے والی متعدد امریکی کمپنیاں اپنے معاہدے کی شرائط کے مطابق ادائیگیاں کرنے میں بری طرح ناکام رہی ہیں۔

یہ بھی پڑھیں : ایران بحران کا واحد حل مذاکرات ہیں، انتونیو گوترش

یہ تشویشناک نئے اعداد و شمار ایک ایسے وقت میں سامنے آئے ہیں جب 30 سالہ امریکی بانڈز کی شرح منافع 2008 کے تباہ کن مالی بحران سے عین قبل کی صورتحال کے مساوی یعنی گزشتہ 22 برس کی بلند ترین سطح تک پہنچ گئی ہے۔ اسی طرح، 10 سالہ بانڈز کی شرح منافع بھی گزشتہ روز 19 برس کی بلند ترین سطح پر ریکارڈ کی گئی ہے۔ توانائی کے بحران اور جھٹکوں کے باعث سرمایہ کاروں کو امریکی معیشت میں افراطِ زر (مہنگائی) کے دوبارہ بے قابو ہونے کا شدید خدشہ لاحق ہے، جس کے باعث وہ ان بانڈز پر زیادہ منافع کا مطالبہ کر رہے ہیں۔

رپورٹ میں مزید انکشاف کیا گیا ہے کہ امریکی خام تیل کی قیمت اس وقت 104 ڈالر فی بیرل سے تجاوز کر چکی ہے اور پٹرول و ڈیزل کی قیمتیں بھی ملکی تاریخ کی ریکارڈ سطح پر پہنچ گئی ہیں۔ نجی قرضوں کی عدم ادائیگی کے اس سنگین معاشی بحران میں صحت کی خدمات (ہیلتھ کیئر)، صنعت اور پیداوار کے شعبے سب سے زیادہ متاثر ہوئے ہیں، جبکہ صرف اگست کے مہینے میں قرضوں کی مدت میں توسیع سے متعلق عدم ادائیگی کے 45 بڑے واقعات سامنے آ چکے ہیں۔