ایران بحران کا واحد حل مذاکرات ہیں، انتونیو گوترش

شیعیت نیوز : اقوام متحدہ کے سیکریٹری جنرل انتونیو گوترش نے کہا ہے کہ ایران سے متعلق بحران کا کوئی حل مذاکرات کے بغیر ممکن نہیں ہے اور مشرق وسطیٰ میں کشیدگی کو کم کرنا عالمی برادری کی اولین ترجیح ہونی چاہیے۔

الجزیرہ کی رپورٹ کے مطابق، انتونیو گوترش نے اس بات پر زور دیا کہ آبنائے ہرمز اور باب المندب میں آزادانہ بحری آمدورفت کو بین الاقوامی قوانین کے مطابق بحال اور برقرار رکھا جانا چاہیے۔ انہوں نے تمام فریقین پر زور دیا کہ وہ ایسے اقدامات سے سختی سے گریز کریں جن سے عام شہری متاثر ہوں۔ ان کا کہنا تھا کہ مشرق وسطیٰ میں کشیدگی کم کرنے اور معاملات کو آگے بڑھانے کا واحد راستہ سفارت کاری اور سنجیدہ مذاکرات ہیں۔

یہ بھی پڑھیں : مغربی ایشیا میں غیر ملکی افواج کی جگہ نہیں ہوگی، ایرانی وزیر خارجہ

فلسطین کے سنگین بحران پر گفتگو کرتے ہوئے سیکریٹری جنرل نے واضح کیا کہ اسرائیل غزہ کے لیے پیش کیے گئے امن منصوبے کو موجودہ شکل میں ہرگز قبول نہیں کر رہا اور اس کے مسلسل حملوں سے عام شہریوں کی جانوں کو شدید خطرات لاحق ہیں۔ انہوں نے مغربی کنارے کے بتدریج الحاق اور ایسی تمام اسرائیلی کارروائیوں کو فوری روکنے کا مطالبہ کیا جو نسلی صفائی کا باعث بن سکتی ہیں۔ انہوں نے دو ریاستی حل کے لیے سازگار حالات پیدا کرنے اور غزہ میں انسانی امداد کی بلا رکاوٹ فراہمی یقینی بنانے پر بھی زور دیا۔

انتونیو گوترش نے مزید کہا کہ یمن کے تنازع کا کوئی فوجی حل ممکن نہیں، اس کے لیے سنجیدہ مذاکرات کا راستہ برقرار رکھنا ناگزیر ہے۔ انہوں نے سوڈان میں بیرونی مداخلت کی مذمت کرتے ہوئے کہا کہ بعض ممالک وہاں کے تنازع کو ہوا دے رہے ہیں جنہیں اس کے لیے جوابدہ ہونا چاہیے۔ اپنے بیان کے آخر میں انہوں نے اقوام متحدہ کی سلامتی کونسل میں اصلاحات کی ضرورت پر زور دیتے ہوئے کہا کہ موجودہ کونسل آج کی دنیا کے بجائے کئی دہائیوں پرانی عالمی صورتحال کی عکاسی کرتی ہے، اور بین الاقوامی قوانین کی خلاف ورزی کرنے والی طاقتوں کے اثر و رسوخ نے اس ادارے کو مفلوج کر دیا ہے۔