ایران کا متحدہ عرب امارات میں امریکی ایئر بیس پر ڈرون حملہ، اہلکار اور ہیلی کاپٹر نشانہ

شیعیت نیوز : ایران نے متحدہ عرب امارات میں واقع المنہاد ایئر بیس پر موجود امریکی فوجی اہلکاروں اور ہیلی کاپٹروں کو اپنے ڈرون حملوں کا نشانہ بنایا ہے۔ ایرانی فوج کے مطابق امریکی اہداف کے خلاف کی گئی اس کارروائی میں درجنوں دھماکہ خیز ڈرونز استعمال کیے گئے ہیں۔

ایرانی فوج نے اپنے بیان میں واضح کیا ہے کہ متحدہ عرب امارات کے المنہاد بیس پر موجود امریکی فوجی اور ان کے ہیلی کاپٹر اس ڈرون حملے کا براہ راست ہدف تھے۔ تہران کے مطابق یہ کارروائی حال ہی میں کیے گئے ایک امریکی حملے کے جوابی ردعمل کے طور پر کی گئی ہے۔

یہ بھی پڑھیں : مجلس علماء مکتب اہل بیت کے زیر اہتمام سیرتِ صادقین کانفرنس کا انعقاد، علمائے کرام کی کثیر شرکت

تہران کی جانب سے جاری کردہ تفصیلات میں بتایا گیا ہے کہ امریکہ نے آبنائے ہرمز کے لارک جزیرے پر حملہ کیا تھا، جس کے نتیجے میں ایرانی پاسدارانِ انقلاب کے اہلکاروں کے ساتھ ساتھ عام شہری بھی شہید اور زخمی ہوئے تھے۔

اسی جانی نقصان اور لارک جزیرے پر امریکی جارحیت کے براہ راست ردعمل کے طور پر، ایرانی فوج نے یہ جوابی قدم اٹھاتے ہوئے درجنوں ڈرونز کے ذریعے امریکی فوجی تنصیبات پر یہ بھرپور کارروائی انجام دی ہے۔