شہداء کے خون سے ایرانی بحریہ مزید طاقتور ہوئی ہے، ایڈمرل شہرام ایرانی

اسلامی جمہوریہ ایران کی بحریہ کے کمانڈر ایڈمرل شہرام ایرانی نے رشت میں باقرالعلوم (ع) بحری تخصصی تربیتی مرکز کے اہلکاروں سے خطاب کرتے ہوئے شہداء کے راستے پر چلنے کا عزم دہرایا۔ انہوں نے واضح کیا کہ دشمن سخت غلطی پر ہے اگر وہ سمجھتا ہے کہ اہلکاروں کی شہادت سے بحریہ کی پیش قدمی رک جائے گی، کیونکہ شہداء کے خون کی برکت سے یہ فورس پہلے سے زیادہ قوت اور استحکام کے ساتھ اپنا راستہ جاری رکھے گی۔

ایڈمرل شہرام ایرانی نے شہداء کے مشن کو آگے بڑھانے پر زور دیتے ہوئے کہا کہ آج ہماری بنیادی ذمہ داری ہے کہ ان کی قربانیوں اور ایثار سے طے کردہ راستے پر پوری استقامت سے چلیں۔ انہوں نے اس عزم کا اظہار کیا کہ جس پرچم کو شہداء نے اپنے خون سے بلند کیا ہے، اسے پوری قوت سے تھامے رکھیں گے اور کسی صورت زمین پر نہیں گرنے دیں گے۔

یہ بھی پڑھیں : جزیرہ لارک پر دشمن کی جارحیت کا سخت ترین جواب دیا جائے گا، ترجمان سپاہ پاسداران

بحریہ کے کمانڈر نے مزید کہا کہ دشمن ایرانی قوم اور اسلامی جمہوریہ ایران کی مسلح افواج کے جذبے کو سمجھنے میں فاش غلطی کا شکار ہے۔ انہوں نے اس بات پر زور دیا کہ شہداء کی جانب سے سپرد کیے گئے پرچم کو عزت و سربلندی کے ساتھ محفوظ رکھ کر آنے والی نسلوں تک پہنچانا ہماری ذمہ داری ہے، کیونکہ ایران کی عزت و آزادی کا راستہ اسی مزاحمت اور استقامت سے آگے بڑھے گا۔

اپنے خطاب کے آخر میں انہوں نے کہا کہ آج ایرانی بحریہ پوری طرح زندہ، متحرک اور طاقتور انداز میں اپنے مقام پر قائم ہے۔ بحریہ کے اہلکار شہداء کے جذبے سے سرشار ہو کر اپنی ذمہ داریاں انجام دے رہے ہیں اور وطنِ عزیز کے دفاع سمیت عظیم ایرانی قوم کے امن و سلامتی کے تحفظ کے لیے کسی بھی کوشش سے دریغ نہیں کریں گے۔