جامعہ عروۃ الوثقیٰ کے زیر اہتمام شاندار سالانہ ’وحدت امت ریلی‘ کا انعقاد

شیعیت نیوز : لاہور میں جشنِ عید میلاد النبی (ص) کی بابرکت مناسبت سے جامعہ عروۃ الوثقیٰ کے زیرِ اہتمام ایک عظیم الشان سالانہ ‘وحدت امت ریلی’ کا انعقاد کیا گیا۔ یہ شاندار ریلی جامعہ سے برآمد ہو کر فیروزپور روڈ سے ہوتی ہوئی قینچی فلائی اوور پر اختتام پذیر ہوئی، جس میں عاشقانِ رسول (ص) اور شہریوں کی ایک بڑی تعداد نے بھرپور شرکت کی۔

تحریک بیداری امت مصطفیٰ کے سربراہ علامہ سید جواد نقوی نے اس عظیم الشان ریلی کی قیادت کی۔ اس ریلی کا بنیادی مقصد امتِ مسلمہ کے درمیان اتحاد، اخوت اور بیداری کا عظیم پیغام عام کرنا تھا۔ شرکاء سے خطاب کرتے ہوئے انہوں نے زور دیا کہ دو ارب مسلمانوں کی موجودگی کے باوجود امتِ مسلمہ اپنے قرآنی تقاضوں پر عمل پیرا ہونے میں ناکام رہی ہے۔

یہ بھی پڑھیں : شیعہ علماء کونسل کا استقبالیہ کیمپ، عید میلاد النبی (ص) پر شیعہ سنی اتحاد کا شاندار مظاہرہ

علامہ جواد نقوی نے واضح کیا کہ حماس، حزب اللہ، یمن اور عراق کے مجاہدین آج عالمی استکبار کے خلاف مزاحمت کی علامت ہیں، جبکہ ایران کی بابصیرت قیادت ایمانی غیرت کا عظیم ستون ہے۔ انہوں نے غاصب اسرائیل اور دہشت گرد امریکہ کی حامی پالیسیوں کی شدید مذمت کرتے ہوئے کہا کہ ان پالیسیوں نے امت کو کمزور کیا ہے اور مظلوموں کے خون پر خاموشی مجرمانہ فعل ہے۔

اپنے خطاب کے آخر میں انہوں نے کہا کہ پاکستانی قوم میں غیرت، ایمان اور بیداری کی بھرپور صلاحیت موجود ہے۔ انہوں نے امت کے فکری اور تعلیمی مراکز پر زور دیا کہ وہ قرآنی نظام کو اپنائیں، کیونکہ ایک صالح قیادت اور قرآن سے وابستگی ہی وہ واحد راستہ ہے جس سے تاریخ کا دھارا بدل کر امت کی حقیقی بیداری یقینی بنائی جا سکتی ہے۔