غزہ کے کمال عدوان ہسپتال کے ڈائریکٹر ڈاکٹر حسام ابو صفیہ کی جان خطرے میں

شیعیت نیوز : ایک بین الاقوامی انسانی حقوق کی تنظیم نے خبردار کیا ہے کہ غزہ کے کمال عدوان ہسپتال کے ڈائریکٹر ڈاکٹر حسام ابو صفیہ، جو دسمبر 2024 سے اسرائیلی حراست میں ہیں، ان کی جان خطرے میں ہے۔

فزیشنز فار ہیومن رائٹس نے ہفتہ کے روز بتایا کہ ان کے وکیل ناصر عودہ نے 2 جولائی کو نیتزان جیل کے راکفیت ڈٹینشن سنٹر میں ڈاکٹر ابو صفیہ سے ملاقات کے دوران ان کی شدید چوٹوں، جسمانی تشدد کے آثار، سانس کی تکلیف اور بار بار بے ہوشی کے واقعات دیکھے۔

وکیل نے بتایا کہ ڈاکٹر ابو صفیہ کو ہاتھ پاؤں جکڑ کر لایا گیا تھا اور ان کے سر، آنکھوں، کانوں اور گردن پر نئی چوٹیں اور زخم تھے۔ ان کی جسمانی حالت اتنی خراب ہو چکی تھی کہ پہچاننا مشکل تھا۔

یہ بھی پڑھیں : شہید رہبر نے مسلمانوں میں اتحاد کی تحریک کو نئی زندگی بخشی، ایرانی صدر

تنظیم نے ڈاکٹر ابو صفیہ اور دیگر طبی عملے کی فوری رہائی کا مطالبہ کیا ہے جو اسرائیلی فورسز نے بغیر کسی الزام یا مقدمے کے حراست میں لیا ہوا ہے۔

تنظیم کے قیدیوں اور نظربندوں کے شعبے کے سربراہ ناجی عباس نے کہا کہ تازہ رپورٹس ڈاکٹر ابو صفیہ کی جان کے بارے میں سنگین تشویش پیدا کر رہی ہیں۔ انہوں نے بتایا کہ ڈاکٹر ابو صفیہ نے حراست کے دوران اپنی جان کے لیے تشویش کا اظہار کیا۔

عباس نے مزید کہا کہ ڈاکٹر ابو صفیہ کی صحت عدالت میں اپنی حراست پر اعتراض کرنے کے بعد مزید خراب ہوئی ہے۔ اسرائیلی حکام تمام قیدیوں کی صحت اور سلامتی کے ذمہ دار ہیں اور فوری بین الاقوامی مداخلت کی ضرورت ہے۔

نوٹ: ڈاکٹر حسام ابو صفیہ کو دسمبر 2024 میں اسرائیلی فورسز نے ہسپتال پر چھاپہ مار کر حراست میں لیا تھا۔