شہید رہبر کے جنازے میں دنیا بھر کے رہنماؤں کا تاریخی اجتماع، پاکستان کا اعلیٰ ترین وفد شریک

شیعیت نیوز : شہید رہبر معظم آیت اللہ سید علی خامنہ ای کی نمازِ جنازہ میں حالیہ دہائیوں میں ایران میں غیر ملکی معززین کا سب سے بڑا اجتماع دیکھنے میں آیا جس میں ایشیا، افریقہ، یورپ، امریکہ اور بڑی بین الاقوامی تنظیموں کے نمائندے شریک ہوئے۔

پاکستان نے اعلیٰ ترین سطح کا وفد بھیجا جس کی قیادت وزیرِ اعظم شہباز شریف اور آرمی چیف فیلڈ مارشل سید عاصم منیر نے کی، وفد میں چیئرمین سینیٹ، سینیئر حکومتی عہدیدار اور مذہبی رہنما بھی شامل تھے۔ عراق سے کردستان کے صدر نیچیروان بارزانی، پارلیمنٹ اسپیکر اور حشد الشعبی کے نمائندے شریک ہوئے جبکہ سعودی عرب نے نائب وزیرِ خارجہ کو بھیجا۔

لبنان سے وزیرِ دفاع کے ساتھ حزب اللہ اور حرکتِ امل کے سینیئر وفود، یمن سے نائب صدر اور انصار اللہ کا وفد اور فلسطین سے حماس کے سینیئر رہنما اور اسلامی جہاد کے سیکرٹری جنرل ضیاء النخالہ بھی شریک ہوئے۔

یہ بھی پڑھیں: شہید امام خامنہ ای کی تشییع عالمی میڈیا کی توجہ کا مرکز، غیر ملکی ذرائع ابلاغ میں وسیع کوریج

روس نے صدر پوتن کے خصوصی نمائندے کے طور پر دمتری میدویدیف کو بھیجا، تاجکستان کے صدر نے خود شرکت کی، آرمینیا کے وزیرِ اعظم، ترکیہ کے نائب صدر، تُرکمانستان کے قومی رہنما، چین کے نیشنل پیپلز کانگریس کے نائب چیئرمین اور ہندوستان کے خصوصی ایلچی بھی تہران پہنچے۔

بین الاقوامی تنظیموں میں شنگھائی تعاون تنظیم، او آئی سی، ڈی 8 اور ای سی او کے سربراہان نے بھی تقریب میں شرکت کی جو اس تاریخی موقع کی عالمی اہمیت کو واضح کرتی ہے۔