انصاف اور وقار کی بنیاد پر مذاکرات کا دروازہ کھلا ہے، قیادت میں اختلافات کی خبریں مسترد، ایران کا اعلان

شیعیت نیوز : اسلامی جمہوریہ ایران کے صدارتی دفتر نے کہا ہے کہ انصاف، وقار اور دانش مندی کی بنیاد پر مذاکرات کا دروازہ اب بھی کھلا ہے۔ ایرانی صدر کے دفتر نے ملکی قیادت میں اختلافات کی خبریں مسترد کر دیں اور کہا کہ ایرانی قیادت کے اندر مثالی اتحاد ہے۔

ترجمان ایران صدارتی دفتر مہدی طباطبائی نے امریکی صدر کا نام لیے بغیر کہا کہ دشمن سیاسی پروپیگنڈا کر رہا ہے، جھوٹ گھڑنے کے بجائے انہیں اپنی وعدہ خلافی، دھونس اور فریب کاری بند کرنی چاہیے، انصاف، وقار اور دانش مندی کی بنیاد پر مذاکرات کا دروازہ اب بھی کھلا ہے۔

علاوہ ازیں ایرانی صدر مسعود پزشکیان نے کہا ہے کہ وعدہ خلافی، ناکہ بندی اور دھمکیاں حقیقی مذاکرات کی راہ میں رکاوٹ ہیں۔ اپنے ایک بیان میں مسعود پزشکیان نے کہا کہ ایران نے مذاکرات اور معاہدے کا خیر مقدم کیا اور کرتا رہے گا، دنیا کو آپ کی منافقانہ بیان بازی اور دعووں اور عمل میں تضاد نظر آ رہا ہے۔

یہ بھی پڑھیں: شہید رہبرِ انقلاب آیت اللہ خامنہ ای کی یاد میں لاہور میں عظیم الشان تعزیتی ریفرنس، علامہ ساجد نقوی، راجہ ناصر عباس اور علامہ جواد نقوی کا خطاب

خیال رہے کہ ایرانی صدر کا یہ بیان ایک ایسے وقت میں سامنے آیا ہے جب امریکی صدر ڈونلڈ ٹرمپ نے توقع ظاہر کی ہے کہ ایران کے ساتھ مذاکرات کا دوسرا دور جمعہ کو ہو سکتا ہے۔ امریکی اخبار کو انٹرویو دیتے ہوئے صدر ٹرمپ کا کہنا تھا کہ فوج کو ہدایت دی ہے کہ ناکہ بندی جاری رکھی جائے اور ہر ممکن صورت حال سے نمٹنے کے لیے تیار رہے، جنگ بندی کو اس وقت تک بڑھایا جا رہا ہے جب تک ایران اپنی تجاویز پیش نہیں کر دیتا۔

دوسری طرف وائٹ ہاؤس کی ترجمان کیرولین لیوٹ نے کہا ہے کہ ایران کے ساتھ غیر معینہ مدت تک جنگ بندی نہیں کی گئی، ایران کو چند متفقہ تجاویز کے لیے چند دن دیے ہیں۔