علامہ راجہ ناصر عباس جعفری کا جامعہ عروۃ الوثقیٰ کا دورہ، علامہ جواد نقوی سے ملاقات

شیعیت نیوز : مجلس وحدت مسلمین پاکستان کے چیئرمین اور سینیٹ میں قائدِ حزبِ اختلاف سینیٹر علامہ راجہ ناصر عباس جعفری نے ایم ڈبلیو ایم کے وائس چیئرمین علامہ سید احمد اقبال رضوی کے ہمراہ جامعہ عروۃ الوثقیٰ کا دورہ کیا اور پرنسپل جامعہ عروۃ الوثقیٰ و سربراہ تحریک بیداری امتِ مصطفیٰ علامہ سید جواد نقوی سے ملاقات کی۔ اس موقع پر انہوں نے رہبرِ معظمِ انقلاب آیت اللہ العظمیٰ سید علی خامنہ ای رحمۃ اللہ علیہ کی شہادت پر دلی تعزیت اور افسوس کا اظہار کیا۔ ملاقات کے دوران اتحادِ بین المسلمین اور بین المؤمنین کے فروغ، امتِ مسلمہ کو درپیش چیلنجز اور موجودہ ملکی و علاقائی صورتحال پر تفصیلی تبادلۂ خیال کیا گیا۔

علمائے کرام نے اس بات پر زور دیا کہ امتِ مسلمہ کی قوت و استحکام کا راز باہمی اتحاد، بصیرت اور معرکۂ حق و باطل میں واضح مؤقف اختیار کرنے میں مضمر ہے۔ اس موقع پر اسلامی جمہوریہ ایران کی سربلندی اور معرکۂ حق و باطل میں اس کی کامیابی کے لیے خصوصی دعا کی گئی۔

یہ بھی پڑھیں : دہشتگرد نتانیاہو عالمی بھیک کے طلبگار، ایران کے خلاف مزید اقدامات کا مطالبہ

مزید برآں شہدائے ملت، بالخصوص شہدائے ترلائی اور رہبرِ معظم کی شہادت کے خلاف ہونے والے مظاہروں کے دوران شہید ہونے والے بے گناہ افراد کے درجات کی بلندی اور لواحقین کے لیے صبرِ جمیل کی بھی دعا کی گئی۔ اس موقع پر قومی پیغام امن کمیٹی کے رکن اور جامعہ عروۃ الوثقیٰ کے پرنسپل مولانا محمد توقیر عباس، ناظم اعلیٰ ناصر مہدی اور رضوان حیدر عابدی بھی موجود تھے۔ بعد ازاں علامہ سید جواد نقوی نے مہمان وفد کے ہمراہ جامعہ اور مسجد بیت العتیق کا دورہ کرایا اور ان کی آمد پر شکریہ ادا کیا۔