تحریک تحفظ آئین پاکستان کا ملک گیر احتجاجی تحریک شروع کرنے کا اعلان

شیعیت نیوز: قومی اسمبلی و سینیٹ میں نامزد اپوزیشن لیڈر اور تحریک تحفظ آئین پاکستان کے سربراہ محمود خان اچکزئی اور وائس چیئرمین علامہ ناصر عباس نے ملک گیر احتجاجی تحریک کا اعلان کر دیا ہے۔

پشتونخوا ملی عوامی پارٹی کے چیئرمین محمود خان اچکزئی اور مجلس وحدت المسلمین کے چیئرمین سینیٹر علامہ راجہ ناصر عباس جعفری نے ایک ویڈیو بیان میں کہا کہ احتجاجی تحریک 9 نومبر (اتوار) سے شروع ہوگی۔

یہ بھی پڑھیں: یمن میں سی آئی اے، موساد اور سعودی انٹیلی جنس کا مشترکہ جاسوسی نیٹ ورک بے نقاب

علامہ راجہ ناصر عباس نے مجوزہ آئینی تبدیلیوں پر افسوس کا اظہار کرتے ہوئے کہا کہ حکومت کو مزید طاقت ’بااختیاروں کے ہاتھوں‘ دے دی گئی ہے۔

انہوں نے کہا کہ اس گھڑی میں پاکستان کے عوام کی ذمہ داری ہے کہ وہ اٹھ کھڑے ہوں اور اس خطرناک آئینی ترمیم کے خلاف آواز بلند کریں۔

اس موقع پر اپوزیشن کے نامزد رہنما محمود خان اچکزئی نے کہا کہ اپوزیشن اتحاد احتجاجی تحریک کے ذریعے یہ دکھائے گا کہ پاکستان کے عوام کی مرضی ہی آخری فیصلہ ہوگی۔

پشتونخوا ملی عوامی پارٹی کے چیئرمین نے کہا کہ "میں کم از کم پانچ مختلف مواقع پر حلف اٹھا چکا ہوں کہ میں آئین کا تحفظ کروں گا، ہماری پارلیمنٹ خود آئین پر حملہ کر رہی ہے۔”

انہوں نے مزید کہا کہ چونکہ پارلیمنٹ عوام کی نمائندہ ہے، اس لیے اپوزیشن اتحاد براہِ راست عوام سے رجوع کر رہا ہے۔ جس طرح وہ پارلیمنٹ پر حملہ کر رہے ہیں اور جس انداز سے وہ آئین اور پاکستان کی بنیادوں کو ہلا رہے ہیں، ہمارے پاس کوئی دوسرا راستہ نہیں بچا۔