فلسطینی قیدیوں کی لاشوں پر ٹارچر کے نشانات، صیہونی بربریت کی داستاں

شیعیت نیوز: ذیلی عنوان: صہیونی جیلوں میں قیدیوں پر بہیمانہ تشدد، بعض کو باقاعدہ پھانسی دی گئی — فلسطینی وزارتِ صحت کی ویب سائٹ پر لاشوں کی تصاویر جاری

فلسطینی لاشوں کے انتظام کی کمیٹی کے رکن اور قیدیوں کے حقوق کے قانونی ماہر سمع حمد نے انکشاف کیا ہے کہ زیادہ تر فلسطینی قیدی شدید تشدد کے باعث شہید ہوئے ہیں۔

عربی نشریاتی چینل کو انٹرویو دیتے ہوئے سمع حمد نے بتایا کہ رہائی پانے والے قیدیوں کے جسموں پر اذیت کے واضح نشانات پائے گئے ہیں۔
ان کے مطابق، تشدد کی شدت ایسی تھی کہ کئی قیدیوں کی موت اسی اذیت کے دوران ہوئی، جبکہ طبی معائنے سے معلوم ہوا ہے کہ بعض قیدیوں کو باقاعدہ طور پر پھانسی دی گئی۔

یہ بھی پڑھیں: نصف امریکی عوام فلسطین کو بطور ریاست تسلیم کرنے کے حامی: رائٹرز سروے

کمیٹی نے فلسطینی وزارتِ صحت سے منسلک ویب سائٹ "صحت” پر قیدیوں کی لاشوں کی تصاویر شائع کی ہیں تاکہ شہداء کے اہلِ خانہ شناخت کر سکیں، کیونکہ صہیونی حکومت نے لاشوں کے بارے میں کوئی معلومات فراہم نہیں کیں۔

تصاویر کے مطابق، کئی قیدیوں کے ہاتھ پیچھے بندھے ہوئے ہیں، آنکھوں پر پٹیاں بندھی ہیں، گلے میں رسیوں کے نشانات ہیں، جبکہ کچھ کے سر، گردن، اور پیٹ پر گہرے زخم موجود ہیں۔
کئی لاشوں میں ہڈیوں کے ٹوٹنے اور جسموں کے جھلسنے کے آثار بھی نمایاں ہیں، جو اس بات کا ثبوت ہیں کہ انہیں نظامی طور پر اذیت دے کر قتل کیا گیا۔