دشمن قومی وحدت کمزور کرنا چاہتا ہے، جنرل موسوی

شیعیت نیوز: ایرانی مسلح افواج کے چیف آف اسٹاف میجر جنرل عبدالرحیم موسوی نے کہا ہے کہ دشمن ایران کی قومی وحدت کو کمزور کرنے کی کوشش کر رہے ہیں، اس لیے افواج کو اپنی تیاری کی بلند ترین سطح برقرار رکھتے ہوئے اسے روز بروز مزید مضبوط کرنا چاہیے۔

تفصیلات کے مطابق، آرمی کیڈٹس کی گریجویشن تقریب سے خطاب کرتے ہوئے جنرل موسوی نے فارغ التحصیل کیڈٹس کو مبارکباد دی اور انہیں مزاحمتی محاذ کے افسران اور مستقبل کے فوجی رہنما قرار دیا۔

انہوں نے کہا کہ آج فلسطین دنیا کا محبوب نام بن چکا ہے اور غزہ ثابت قدمی اور خون کی تلوار پر فتح کی علامت بن گیا ہے۔

یہ بھی پڑھیں : صنعا میں یمنی فوج کے سربراہ جنرل الغماری کی تشییع جنازہ؛ لاکھوں سوگواروں کی شرکت

جنرل موسوی نے آپریشن طوفان الاقصی کے دور رس اثرات پر روشنی ڈالتے ہوئے کہا کہ یہ کارروائی خطے اور دنیا میں بڑے پیمانے پر تبدیلیوں کا نقطۂ آغاز ثابت ہوئی ہے۔

انہوں نے کہا کہ امریکہ اور صہیونی حکومت نے برسوں تک میڈیا پر غلبہ حاصل کرکے خود کو حق پرست ظاہر کرنے کی کوشش کی، لیکن اب ان کی اصل مجرمانہ اور خونخوار فطرت دنیا کے سامنے بے نقاب ہو چکی ہے۔ فلسطین جو کبھی فراموشی کے دہانے پر تھا، آج دوبارہ عالمی توجہ کا مرکز بن چکا ہے۔

جنرل موسوی نے مزید کہا کہ صہیونی حکومت نے امریکہ کی حمایت سے ایران پر حملے کی کوشش کی تاکہ اپنی رسوائی، عوامی نفرت اور اندرونی انتشار سے بچ سکے، لیکن اسے عبرتناک شکست کا سامنا کرنا پڑا اور آخرکار جنگ بندی کی درخواست کرنے پر مجبور ہو گیا۔

انہوں نے آخر میں زور دیا کہ دشمن ایران کی مزاحمتی قوت کو کمزور کرنا چاہتا ہے، اس لیے ایرانی افواج کو اپنی تیاری کی بلند ترین سطح برقرار رکھنی چاہیے اور اسے مسلسل مضبوط کرتے رہنا چاہیے۔