نتنیاہو کو عالمی عدالت میں نسل کشی کے جرم پر کٹہرے میں لایا جائے، صدر چلی

شیعیت نیوز : چلی کے صدر گیبریل بوریک نے اسرائیل کے وزیراعظم بنیامین نتنیاہو کو کڑی تنقید کا نشانہ بناتے ہوئے کہا ہے کہ وہ اس کی موت نہیں بلکہ اس کا عالمی عدالت انصاف میں نسل کشی کے جرم میں مقدمہ چلائے جانے کے خواہشمند ہیں۔

نیو یارک میں ایک پرجوش خطاب کے دوران بوریک نے اسرائیلی حکومت کو شدید الفاظ میں موردِ الزام ٹھہراتے ہوئے کہا:
"ہزاروں بے گناہ انسان صرف فلسطینی ہونے کے جرم میں اپنی جانوں سے ہاتھ دھو بیٹھے ہیں۔ غزہ آج ایک عالمی مسئلہ ہے کیونکہ یہ محض سیاسی نہیں بلکہ انسانی بحران ہے۔”

انہوں نے کہا:
"میں یہ نہیں چاہتا کہ نتنیاہو اور اس کا خاندان کسی میزائل حملے میں مارے جائیں، بلکہ میرا مطالبہ ہے کہ نتنیاہو اور وہ تمام ذمہ داران، جنہوں نے فلسطینی قوم کے خلاف نسل کشی کی، ایک بین الاقوامی عدالت میں انصاف کے کٹہرے میں کھڑے ہوں۔”

یہ بھی پڑھیں : سی سی ڈی کا بڑا آپریشن، کالعدم لشکرِ جھنگوی کے 3 دہشت گرد واصل جہنم

نومبر 2023 میں صدر بوریک نے تل ابیب سے چلی کے سفیر کو واپس بلا لیا تھا، اگرچہ دونوں ممالک کے درمیان باضابطہ طور پر سفارتی تعلقات منقطع نہیں ہوئے۔

واضح رہے کہ چلی اور فلسطین کے تعلقات تاریخی پس منظر رکھتے ہیں۔ تقریباً پانچ لاکھ افراد پر مشتمل فلسطینی برادری کے ساتھ، چلی مشرقِ وسطیٰ سے باہر سب سے بڑی فلسطینی آبادی کا حامل ملک ہے۔ چلی نے 2011 میں فلسطین کو باضابطہ طور پر تسلیم کیا اور اس کی یونسکو میں رکنیت کی حمایت بھی کی۔

وزارتِ صحت غزہ کے مطابق، جو 2007 سے حماس کے زیر انتظام ہے، اب تک کم از کم 65 ہزار سے زائد فلسطینی شہید ہو چکے ہیں جن میں اکثریت عام شہریوں کی ہے، اور یہ سب اسرائیلی حملوں کے نتیجے میں جان کی بازی ہار گئے۔