ایران بھر میں حضرت امام رضا علیہ السلام کا یوم شہادت عقیدت و احترام کے ساتھ منایا جا رہا ہے

شیعیت نیوز : آسمان امامت و ولایت کے آٹھویں درخشاں ستارے، فرزندِ رسول صلی اللہ علیہ وآلہ وسلم اور شیعیانِ جہان کے آٹھویں امام حضرت امام علی ابن موسیٰ الرضا علیہ الصلوات و السلام کے یومِ شہادت پر ایران بھر میں آج عام تعطیل ہے اور ملک کے تمام شہروں اور قصبوں میں مجالسِ عزا منعقد کی جا رہی ہیں۔

حضرت امام علی بن موسیٰ الرضا علیہ السلام کے یومِ شہادت کے موقع پر اسلامی جمہوریہ ایران کے دارالحکومت تہران، مشہد مقدس اور قم سمیت تمام چھوٹے بڑے شہروں میں مجالسِ عزا کا سلسلہ جاری ہے۔

یہ بھی پڑھیں : امام رضاؑ کی شہادت پر لاکھوں زائرین مشہد مقدس میں جمع

واضح رہے کہ اسلامی جمہوریہ ایران میں ہر سال 28 صفر کو رسولِ خدا حضرت محمد مصطفی صلی اللہ علیہ وآلہ وسلم کا یومِ رحلت اور آپ کے پیارے نواسے حضرت امام حسن علیہ السلام کا یومِ شہادت جبکہ 30 صفر کو حضرت امام رضا علیہ السلام کا یومِ شہادت منایا جاتا ہے۔

خیال رہے کہ کورونا وائرس کی وجہ سے اس سال بڑے پیمانے پر آپ کی شہادت کے مراسم برپا نہیں ہو رہے تاہم اس کے باوجود طبی اصولوں کو مد نظر رکھتے ہوئے ایران کے کونے کونے میں مجالسِ عزا کا انعقاد جاری ہے۔

فرزندِ رسول صلی اللہ علیہ وآلہ وسلم، سلطانِ عرب و عجم حضرت امام علی بن موسیٰ الرضا علیہ السلام گیارہ ذی القعدہ سنہ 148 ہجری قمری کو مدینہ منورہ میں اس دنیا میں تشریف لائے اور صفر کے مہینے کی آخری تاریخ میں آپ کی شہادت ہوئی۔

امام رضا علیہ السلام کے علم کا اتنا شہرہ تھا کہ آپ کو "عالم آل محمدؐ” کے نام سے بھی شہرت حاصل تھی۔ آپ کا اسمِ گرامی علی اور کنیت ابوالحسن ہے۔