صیہونی انتہا پسندوں کا مقبوضہ جولان پر دھاوا، نئی بستی "نیو بشان” قائم

شیعیت نیوز : صیہونی میڈیا آؤٹ لیٹ آئی 24 نیوز نے انکشاف کیا ہے کہ متعدد انتہا پسند صیہونیوں نے نئی بستیوں کے قیام کی غرض سے مقبوضہ شام کے علاقے جولان پر ہلہ بول دیا ہے۔

رپورٹ میں کہا گیا ہے کہ متعدد انتہا پسند صیہونیوں نے شام میں جاری ہنگامہ آرائی سے فائدہ اٹھاتے ہوئے گزشتہ روز مقبوضہ جولان پر دھاوا بول کر "نیو بشان” کے نام سے ایک نئی بستی قائم کرلی ہے۔

صیہونی انتہا پسندوں نے اسرائیلی فوج سے کہا کہ وہ طویل عرصے تک علاقے میں موجود رہے اور نئی بستی کے قیام کے لیے اقدامات کرے۔

بشان پائینرز موومنٹ کے ایک رکن نے اسرائیلی چینل 7 کے ساتھ ایک انٹرویو میں دعویٰ کیا کہ سلامتی کے نقطہ نظر سے ان بستیوں میں رہنا درست ہے جنہیں اسرائیلی فوج مستقبل میں کنٹرول کرے گی۔

یہ بھی پڑھیں : جنگ بندی بھارتی خواہش پر ہوئی،پاکستان نے کسی کو سیز فائر کروانے کا نہیں کہا، اسحٰق ڈار

یہ اقدام ایسے وقت میں سامنے آیا ہے جب گزشتہ سال شام کے سابق صدر بشار الاسد کی حکومت کے خاتمے کے محض چند دن بعد اسرائیلی وزیر اعظم بنجمن نیتن یاہو نے جولان کے بارے میں 1974 کے شام۔اسرائیل معاہدے کو ختم کرنے کا اعلان کرتے ہوئے اس علاقے میں بفر زون قائم کرنے کا حکم دیا تھا۔

اس فیصلے کے بعد اسرائیلی کابینہ نے شام کے مزید علاقے پر قبضہ کرنے کی غرض سے مقبوضہ جولان میں نئی صیہونی بستیوں کی تعمیر پر بھی اتفاق کیا۔

مختلف ممالک اور بین الاقوامی اداروں نے اسرائیل کے اس اقدام کی مذمت کرتے ہوئے اسے بین الاقوامی قوانین کی خلاف ورزی قرار دیا ہے۔