ریمدان مارچ سے پیچھے نہیں ہٹیں گے، علماءو اکابرین کا خطاب

شیعیت نیوز : مجلس وحدت مسلمین پاکستان کے وائس چیئرمین علامہ سید احمد اقبال رضوی نے زیارتی قافلہ سالاروں، شیعہ علماء اور عمائدین کے ہمراہ امام بارگاہ شہدائے کربلا انچولی سوسائٹی کراچی میں ایک ہنگامی پریس کانفرنس سے خطاب کرتے ہوئے اعلان کیا ہے کہ ہر صورت تمام تر رکاوٹوں کو عبور کرتے ہوئے بدھ 6 اگست کو پُرامن زائرین مارچ کراچی سے ریمدان بارڈر کی جانب روانہ ہوگا۔

انہوں نے کہا کہ کاروان کی قیادت ایم ڈبلیو ایم کے مرکزی چیئرمین سینیٹر علامہ راجہ ناصر عباس جعفری کریں گے، جبکہ مارچ میں تمام ملی تنظیمیں بھرپور شرکت کریں گی۔

علامہ احمد اقبال رضوی نے کہا کہ ہر سال لاکھوں زائرین زمینی راستے سے کم خرچے میں عراق زیارت کیلئے جاتے ہیں، لیکن اس سال وفاقی حکومت کی اچانک بیجا پابندی سے زائرین شدید پریشان ہیں۔ ان کا کہنا تھا کہ وزیر مملکت برائے داخلہ طلال چوہدری سے زائرین کے مسئلے پر ملاقات ہوئی تھی اور انہوں نے مثبت عندیہ دیا تھا، لیکن حکومت اب پابندی لگا کر اپنی ناکامی کا اعلان کر رہی ہے۔

یہ بھی پڑھیں : گورنر سندھ ہوش کے ناخن لیں! زیارت ہمارا آئینی اور عقیدتی حق ہے، شہریار سید

انہوں نے کہا کہ بلوچستان کے خراب حالات کی مکمل ذمہ داری وفاقی حکومت پر عائد ہوتی ہے۔ گورنر سندھ کامران ٹیسوری زیارات ٹور آپریٹرز کا مسئلہ آج حل کرنے کی بات کر رہے ہیں، لیکن سوال یہ ہے کہ وہ اب تک کہاں تھے؟ زائرین کا مسئلہ کئی دنوں سے جاری ہے، اور گورنر سندھ اب جاگے ہیں۔

انہوں نے کہا کہ گورنر سندھ کو ذمہ داری لینا ہوگی، اگر وہ زائرین کے مسائل حل کرنا چاہتے ہیں تو یہاں آئیں اور اعلان کریں کہ یہ مسائل وہ خود حل کریں گے۔ آئین کے آرٹیکل 20 کے تحت ہمیں مکمل مذہبی آزادی حاصل ہے، اور سندھ بھر سے قافلوں کی آمد کا سلسلہ جاری ہے۔ بلوچ رہنماؤں نے بھی ہمارے قافلوں کا بلوچستان میں خیرمقدم کرنے کا اعلان کیا ہے۔

پریس کانفرنس سے خطاب کرتے ہوئے جعفریہ الائنس پاکستان کے نائب صدر علامہ باقر حسین زیدی نے کہا کہ گورنر سندھ زائرین کے مسئلے پر کھلواڑ کر رہے ہیں، ملت جعفریہ اپنے فیصلے میں خودمختار ہے اور کراچی سے ریمدان بارڈر مارچ میں بھرپور شرکت کرے گی۔

مجلس ذاکرین امامیہ پاکستان کے صدر علامہ نثار قلندری نے کہا کہ زائرین پورے سال زیارات پر جانے کے لیے اپنا پیٹ کاٹ کر انتظامات کرتے ہیں، لہٰذا وفاقی حکومت زمینی راستے کھولے اور سہولیات فراہم کرے۔ انہوں نے امید ظاہر کی کہ حکومت زائرین پر سے پابندی ہٹا دے گی۔

ایم ڈبلیو ایم کراچی کے صدر علامہ صادق جعفری نے کہا کہ نواسہ رسولؐ کے حرم مقدس کی زیارات پر پابندی ایک بڑا المیہ ہے۔ اگر گورنر سندھ سچے ہیں تو زائرین کو سہولیات فراہم کریں، اور کراچی سے ریمدان بارڈر تک پُرامن قافلوں کے راستے میں رکاوٹیں نہ کھڑی کی جائیں۔

پریس کانفرنس میں مجلس وحدت مسلمین کے مرکزی، صوبائی و ڈویژنل رہنماؤں سمیت مختلف ملی تنظیموں، اداروں اور قافلہ سالاروں کی بڑی تعداد شریک تھی۔