امریکہ جارحیت اور بحری ناکہ بندی ختم کرے، اقوام متحدہ میں ایرانی سفیر

شیعیت نیوز : اقوام متحدہ میں ایران کے مستقل نمائندے نے سلامتی کونسل کے اجلاس میں کہا ہے کہ اگر امریکہ واقعی سفارتی حل کا پابند ہے تو اسے فوری اور غیر مشروط طور پر اپنی جارحیت ختم کرنا ہوگی اور بحری ناکہ بندی سمیت تمام یک طرفہ اور غیر قانونی اقدامات ختم کرنا ہوں گے۔

مشرق وسطیٰ کی صورتحال پر خطاب کرتے ہوئے ایرانی سفیر نے کہا کہ ایران نے کبھی سفارت کاری کے دروازے بند نہیں کیے اور گزشتہ دو برسوں میں متعدد بار نیک نیتی سے مذاکرات میں حصہ لیا، لیکن امریکہ کے مسلسل طرز عمل نے گہرے عدم اعتماد کو جنم دیا ہے۔ قابل اعتماد ضمانتوں کے بغیر مذاکرات دوبارہ شروع ہونے پر سنجیدہ شکوک موجود ہیں۔

یہ بھی پڑھیں : جنگ یا امن کا فیصلہ اب وائٹ ہاؤس کو کرنا ہے، ایرانی وزیر خارجہ

ایرانی سفیر نے خبردار کیا کہ امریکی سامراج اور صیہونی حکومت کی جانب سے جارحانہ جنگ دوبارہ شروع کرنے کی کسی بھی کوشش کا فوری، فیصلہ کن اور بلا تردد جواب دیا جائے گا، جو جارحیت کے منبع کو، وہ جہاں بھی ہو، نشانہ بنائے گا۔ ایران بین الاقوامی قوانین کے مطابق اپنا حق دفاع استعمال کرے گا۔

انہوں نے سلامتی کونسل پر زور دیا کہ وہ اپنے مطالبات کا رخ جارحیت کرنے والے ملک کی طرف کرے، نہ کہ اس کا نشانہ بننے والے ملک کی طرف، اور امریکہ سے مطالبہ کرے کہ وہ تمام غیر قانونی اقدامات اور دھمکیاں ختم کر کے اقوام متحدہ کے منشور اور بین الاقوامی قوانین کا احترام کرے۔