آبنائے ہرمز سے گزرنے والے جہازوں کو بیمہ کمپنیوں کا تحفظ دینے سے انکار

شیعیت نیوز : امریکہ میں قائم بیمہ کمپنیوں کے ایک گروپ کے سربراہ نے کہا ہے کہ ان کے گروپ سے وابستہ کوئی بھی بیمہ کمپنی موجودہ حالات میں آبنائے ہرمز سے گزرنے والے جہازوں کے خطرات کی ذمہ داری قبول کرنے کو تیار نہیں ہے۔

انہوں نے آبنائے ہرمز کی موجودہ صورتحال میں تعطل اور غیر یقینی کیفیت کا حوالہ دیتے ہوئے خبردار کیا کہ حالات کسی بھی وقت مزید کشیدہ ہو سکتے ہیں، اور جب تک صورتحال واضح نہیں ہوتی، آبنائے سے جہاز گزارنے کے لیے بیمہ تحفظ حاصل کرنا ممکن نہیں ہوگا۔

یہ بھی پڑھیں : ہرمز کے جنوب میں مزید دو آئل ٹینکر سرنگوں سے ٹکرا گئے، سپاہ پاسداران

یہ بیان ایسے وقت سامنے آیا ہے جب ایرانی حکام کے مطابق گزشتہ دو ہفتوں کے دوران آبنائے ہرمز کا غیر قانونی راستہ اختیار کرنے کے باعث 12 سے زائد جہازوں کو نقصان پہنچا ہے۔ ایرانی حکام کے مطابق اس غیر قانونی راستے سے مراد عموماً آبنائے ہرمز کی جنوبی راہداری ہے۔

سپاہ پاسداران انقلاب اسلامی کی بحریہ نے 14 نومبر کو بھی اعلان کیا تھا کہ ریڈار بند کر کے غیر مجاز راستے سے گزرنے والے دو آئل ٹینکر آبنائے ہرمز کے جنوب میں سمندری سرنگوں سے ٹکرا گئے، اور جہازوں کے مالکان کو خبردار کیا تھا کہ بحریہ کے کنٹرول مرکز سے ہم آہنگی کے بغیر آمدورفت کا انجام بھی یہی ہوگا۔