امریکی و اسرائیلی مصنوعات کا بائیکاٹ امت کا اہم ہتھیار ہے، عبدالمالک الحوثی

شیعیت نیوز: یمن کی تحریک انصار اللہ کے سربراہ عبدالمالک الحوثی نے حسین بدر الدین الحوثی کی برسی کے موقع پر اپنے بیان میں کہا کہ سابق رژیم نے 2004 میں ہمارے قائد حسین بدر الدین الحوثی کو شہید کر کے ناقابل تلافی جرم کا ارتکاب کیا۔

انہوں نے کہا کہ شہید حسین بدر الدین نے قرآنی منطق کے مطابق استکبار کے خلاف آواز اٹھائی اور امت اسلامیہ پر ہونے والے حملوں کی وجہ سے امریکی و اسرائیلی مصنوعات کے بائیکاٹ کی درخواست کی۔

یہ بھی پڑھیں: امام مہدیؑ کی شان میں گستاخی پر کارروائی، جلد گرفتاری ہوگی، ترجمان گلگت بلتستان حکومت

عبدالمالک الحوثی نے کہا کہ 11 ستمبر کے بعد یمن میں سابق رژیم نے امریکہ کو فوجی، سیکورٹی، اقتصادی، تعلیمی اور مذہبی میدان میں مداخلت کا موقع فراہم کیا۔ انہوں نے زور دیا کہ امت اسلامیہ کو امریکی تسلط اور اپنے خلاف ہونے والے ظلم کا دینی اصولوں کی بنیاد پر مقابلہ کرنا چاہئے۔

انصار اللہ تحریک کے سربراہ نے کہا کہ امت اسلامیہ کے خلاف امریکی صہیونی منصوبہ نہایت خطرناک اور تباہ کن ہے۔ انہوں نے کہا کہ امریکی و اسرائیلی مصنوعات کا بائیکاٹ اقوام کے لیے ایک اہم ہتھیار ہے، کیونکہ دشمن ہمارے ممالک کے وسائل کو لوٹ کر ہماری قوموں کو بازار کے طور پر استعمال کرتے ہیں۔