پاراچنار کے مظلوم عوام کے دھرنے کی حمایت، شیعہ علماء کونسل کا حکمرانوں کو انتباہ
ضلع کرم کے راستوں کی بندش اور ادویات کی قلت سے انسانی بحران، شیعہ قیادت کا احتجاج کا عندیہ
شیعیت نیوز: شیعہ علماء کونسل پاکستان نے ضلع کرم کے راستوں کی بندش کے باعث ادویات اور دیگر اشیائے زندگی کی قلت سے پیدا شدہ انسانی جانوں کے ضیاع پر منعقدہ پاراچنار کے عوام کے دھرنے کی حمایت کا اعلان کیا ہے اور حکمرانوں کو متنبہ کیا ہے کہ اگر مقامی عوام کے مطالبات کو فی الفور تسلیم کرتے ہوئے ضلع کرم کے راستے جلد از جلد نہ کھولے گئے تو یہ حمایت ملک بھر میں احتجاج کا رخ اختیار کر سکتی ہے۔
شیعہ علماء کونسل پاکستان کے مرکزی سیکریٹری جنرل علامہ شبیر حسن میثمی نے پاراچنار کی مظلوم عوام کے ساتھ یکجہتی کا اعلان کرتے ہوئے کہا کہ زمینی کشیدگی کے باعث شروع ہونے والے تنازعے کے حل میں حکمرانوں کی خاموشی اور عدم دلچسپی جانی نقصان کا باعث بنی اور اس تنازعے کو فرقہ وارانہ رنگ دیا گیا۔
انہوں نے کہا کہ قائد ملت جعفریہ پاکستان علامہ سید ساجد علی نقوی دامہ برکاتہ کی فوری اور خصوصی ہدایت پر ان واقعات کی سنگینی سے حکمرانوں اور قانون نافذ کرنے والے اداروں کے اعلیٰ حکام کو بار بار متوجہ کیا گیا، لیکن کوئی عملی اقدامات نہیں کیے گئے جس سے مقامی علاقے پاراچنار پر اطراف سے حملہ آور دہشت گردوں کے حوصلے بلند ہوئے اور عوام کو بدترین دہشت گردی کا نشانہ بنایا گیا۔
یہ بھی پڑھیں: پاراچنار تکفیری محاصرے کا شکار، پاکستان کے مختلف شہروں میں احتجاجی دھرنے
انہوں نے مزید کہا کہ تب بھی گورنر خیبرپختونخوا سے بار بار ملاقاتیں کرکے ان کو مزید واقعات کے تدارک کے لیے قاتلوں کے خلاف فوری کارروائی کا مطالبہ کیا گیا۔ صوبائی حکمرانوں سے بھی رابطوں کے باوجود وزیراعلیٰ سمیت کسی نے بھی اس اہم مسئلے پر توجہ نہیں دی، جو افسوسناک ہے۔
علامہ شبیر حسن میثمی کا کہنا تھا کہ عوام کے اس مظلومانہ قتل عام کے بعد ان کے راستوں کو مسدود کرکے ان کا رابطہ ملک کے دیگر حصوں سے منقطع کر دیا گیا، جس کے باعث ادویات اور دیگر اشیائے زندگی کی رسد نہ ہونے کی وجہ سے پاراچنار انسانی المیے سے دوچار ہے۔ دو ماہ سے زائد عرصے کے اس تعطل سے کئی معصوم بچے اور بزرگ ادویات نہ ہونے کے باعث رحلت کر چکے ہیں، لیکن ابھی تک حکمرانوں کے کان پر جوں تک نہیں رینگی۔
