پاراچنار کے مظلوم عوام کے ساتھ ہیں، ملک گیر احتجاج اتحاد کا ثبوت ہے: علامہ مقصود ڈومکی

شیعیت نیوز: مجلس وحدت مسلمین پاکستان کے مرکزی رہنما علامہ مقصود علی ڈومکی نے کہا ہے کہ ہم پاراچنار کے مظلوم عوام کے ساتھ ہیں۔ ایم ڈبلیو ایم نے ملک گیر احتجاج کرکے یہ پیغام دیا کہ پورے پاکستان کے عوام مظلوم پاراچنار کے ساتھ ہیں۔

یہ بات انہوں نے سندھ کے شہر دادو کے مختلف علاقوں کے دورے کے موقع پر گفتگو کرتے ہوئے کہی۔ علامہ مقصود علی ڈومکی نے اٹھیں شاخ میں زیر تعمیر امام بارگاہ اور مسجد کا دورہ کیا اور عوام سے ملاقات کی۔ جبکہ گوٹھ غلام حسین گاڈھی میں شیعہ علماء کونسل کے تعلقہ صدر مولانا ظفر علی لغاری کے والد محترم کی وفات پر ورثا سے تعزیت کی۔ اس موقع پر ضلعی رہنما اصغر حسینی، ایم ڈبلیو ایم رہنما مولانا اعجاز علی لغاری، استاد عابد لغاری و دیگر بھی ان کے ہمراہ تھے۔

یہ بھی پڑھیں: دنیا کی کوئی طاقت سپاہ پاسداران کو شکست نہیں دے سکتی: جنرل سلامی

امام بارگاہ میں عوام سے خطاب کرتے ہوئے علامہ مقصود علی ڈومکی نے کہا کہ اس وقت عالم اسلام اور مقاومتی بلاک عالم کفر اور عالمی استکبار کے خلاف نبرد آزما ہے۔ ولی خدا نائب امام کی قیادت میں دنیا بھر کے صالح انسان خدا کی زمین پر عادلانہ نظام اور دین خدا کے نفاذ کے لیے مصروف عمل ہیں۔

حق و باطل کی اس جنگ میں ہم اہل حق کے ساتھ کھڑے ہیں اور شیطان بزرگ امریکا، اسرائیل اور دیگر شیطانی قوتوں کے خلاف ڈٹ کر مقابلہ کر رہے ہیں۔ انہوں نے کہا کہ اتحاد بین المومنین قرآنی حکم اور وقت کی اہم ضرورت ہے۔ ہم پاراچنار کے مظلوم عوام کے ساتھ کھڑے ہیں۔ مجلس وحدت مسلمین نے ملک گیر احتجاج کرکے یہ پیغام دیا کہ پورے پاکستان کے عوام مظلوم پاراچنار کے ساتھ ہیں۔