پارہ چنار میں شیعہ نسل کشی بند کرو!بھارت کے شہر لکھنو میں شیعہ تنظیموں کا امن مارچ اور تعزیتی ریفرنس
مولانا یعسوب عباس نے اس بات پر افسوس کا اظہار کیا کہ مسئلہ فلسطین پر یکجہتی کا مظاہرہ کرنے والی مسلم کمیونٹی شیعہ مسلمانوں کی نسل کشی پر خاموشی اختیار کئے ہوئے ہے۔
شیعیت نیوز: لکھنو۔ شیعہ تنظیم حیدری ٹاسک فورس نے جمعرات کو درگاہ حضرت عباس علیہ السلام پر پارہ چنار میں شیعوں کے قتل عام کے خلاف مولانا یعسوب عباس کی قیادت میں احتجاج کیا۔
مولانا یعسوب عباس نے کہا کہ وہاں کئی دہائیوں سے شیعہ مسلمانوں کا قتل عام کیا جا رہا ہے۔
یہ احتجاج 21 نومبر کو پاکستان کے علاقہ کرم میں دہشت گردوں کے ہاتھوں شیعہ مسلمانوں کے بہیمانہ قتل کے خلاف کیا گیا۔
اس دوران مظاہرین نے رستم نگر علاقہ میں کینڈل مارچ بھی نکالا۔
کینڈل مارچ سے قبل شہداء پارہ چنار کی یاد میں مجلس عزا منعقد ہوئی جسے مولانا یعسوب عباس نے خطاب کیا۔
انہوں نے کہا کہ دہشت گردوں نے ظلم کی حدیں پار کرتے ہو گئے خواتین اور بچوں سمیت 100 شیعہ مسلمانوں کو نشانہ بنایا۔
مولانا یعسوب عباس نے اس بات پر افسوس کا اظہار کیا کہ مسئلہ فلسطین پر یکجہتی کا مظاہرہ کرنے والی مسلم کمیونٹی شیعہ مسلمانوں کی نسل کشی پر خاموشی اختیار کئے ہوئے ہے۔
احتجاج میں موجود آل انڈیا شیعہ پرسنل لاء بورڈ کے صدر مولانا صائم مہدی نقوی، مولانا سید انور حسین رضوی، مولانا سید محمد مسلم، مولانا مرزا رضا عباس، مولانا افضل رضوی نجفی سمیت کثیر تعداد میں مومنین نے شرکت کی۔
