ایران: پابندیوں کی دھمکی دینے کے بجائے احترام کے ساتھ بات کی جائے

شیعیت نیوز: مہر خبررساں ایجنسی کی رپورٹ کے مطابق، لندن میں ایرانی سفارت خانے نے گذشتہ روز ایرانی سیٹلائٹ چمران 1 کی کامیاب لانچنگ کا خیر مقدم کرتے ہوئے ایک بیان جاری کیا ہے۔ بیان میں کہا گیا ہے کہ خلائی ٹیکنالوجی میں ملک کے انجینئرز نے ایک اہم کارنامہ انجام دیا ہے۔

بیان میں مزید کہا گیا ہے کہ ایک وقت ایسا تھا جب ایران دفاعی شعبے میں کمزور تھا اور دوسرے ممالک سے دفاعی آلات اور ہتھیار خریدنے پر مجبور تھا۔ آج ایران دفاعی شعبے میں خودکفیل ہو چکا ہے۔

سفارت خانے نے اپنے بیان میں یہ بھی کہا ہے کہ وسیع پابندیوں کے باوجود ایران جدید ترین راکٹ تیار کر رہا ہے۔ یہ وقت پابندیوں کی دھمکی دینے کا نہیں، بلکہ باہمی احترام کے ساتھ مذاکرات کرنے کا ہے۔

یہ بھی پڑھیں : حنا ربانی کھر: پاکستان کو ایران کے خلاف مغربی پابندیوں کی پیروی کی ضرورت نہیں

یاد رہے کہ ایران نے ہفتے کی صبح تحقیقاتی سیٹلائٹ چمران 1 کو کامیابی کے ساتھ مدار میں بھیج دیا تھا، جو زمین سے 550 کلومیٹر دور فضا میں موجود ہے۔ سیٹلائٹ نے ابتدائی ڈیٹا بھیجنا شروع کر دیا ہے۔

یہ سیٹلائٹ وزارت دفاع کے ذیلی ادارے ایران الیکٹرانکس انڈسٹریز (سائران) کے خلائی ڈویژن کے ایرانی انجینئرز نے ڈیزائن اور بنایا تھا۔ سیٹلائٹ کو بنانے میں ایرو اسپیس ریسرچ انسٹی ٹیوٹ (اے آر آئی) کے ماہرین اور مقامی کمپنیوں کا تعاون بھی شامل تھا۔