امت اسلامی کے تشخص کو کبھی فراموش نہ کیا جائے، رہبر معظم کا اہل سنت علماء سے خطاب

شیعیت نیوز : مہر خبررساں ایجنسی کے نامہ نگار کے مطابق، رہبر معظم انقلاب اسلامی آیت اللہ العظمی خامنہ ای نے ہفتہ وحدت کی مناسبت سے ایران بھر کے اہل سنت ائمہ جمعہ اور مدارس کے سربراہان سے ملاقات کی اور امت اسلامی کا تشخص برقرار رکھنے کی ضرورت پر زور دیا۔ انہوں نے کہا کہ دشمن امت اسلامی کا تشخص مٹانے کی مذموم سازش کر رہے ہیں، لہذا اس موضوع کو کبھی فراموش نہیں کرنا چاہئے۔

رہبر معظم نے کہا کہ امت اسلامی کا تشخص برقرار رکھنا قومی تشخص سے زیادہ اہم ہے، اور جغرافیائی سرحدیں اسلامی تشخص کو ختم نہیں کرسکتیں۔ دشمن مسلمانوں کو اسلامی تشخص سے محروم کرنے کی سازشیں کر رہے ہیں۔ غزہ اور دیگر مقامات پر مسلمانوں کی مشکلات سے دوسرے مسلمانوں کو درد محسوس نہ ہونا اسلامی تعلیمات کے خلاف ہے۔

رہبر معظم نے اہل سنت علماء کو تاکید کی کہ وہ اسلامی تشخص پر تکیہ کریں۔ انہوں نے کہا کہ دشمن عالم اسلام اور خصوصا ایران میں مذہبی اختلافات کو ہوا دینے کی کوشش کر رہے ہیں، اور اس کے لئے بعض افراد کو شیعہ اور سنی کے درمیان بدگوئی اور توہین پھیلانے پر اکسا رہے ہیں۔

انہوں نے ان سازشوں کا مقابلہ کرنے کے لئے وحدت اور اتحاد پر زور دیا اور کہا کہ وحدت قرآن کے اصولوں میں سے ایک ہے۔

یہ بھی پڑھیں: اسرائیل کیلئے بہت سارے سرپرائز آنے والے ہیں، انصار الله

آیت اللہ خامنہ ای نے کہا کہ دشمن کی سازشوں کے باوجود اہل سنت برادری نے بھرپور مقابلہ کیا ہے، اور دفاع مقدس کے دوران اور دیگر مواقع پر 15 ہزار سے زائد اہل سنت انقلاب کی حفاظت کے لئے جانیں قربان کر چکے ہیں۔

انہوں نے مزید کہا کہ امت اسلامی کی عزت کو بچانے کا واحد طریقہ اتحاد ہے۔ آج غزہ اور فلسطینی مظلوم عوام کی حمایت قطعی واجب ہے، اور اس میں کوتاہی کرنے والے سے اللہ سوال کرے گا۔

ملاقات کے دوران سیستان و بلوچستان سے تعلق رکھنے والے مولوی عبدالرحمن چابھاری، ہرمزگان سے تعلق رکھنے والے مولوی عبدالرحیم خطیبی اور مغربی آذربائجان سے تعلق رکھنے والے ماموستا عبدالسلام امامی نے بھی خطاب کیا اور رہبر معظم کا شکریہ ادا کیا۔