پاکستان کا امریکی پابندیوں کے خلاف شدید ردعمل

شیعیت نیوز: پاکستان نے امریکہ کی جانب سے بعض چینی کمپنیوں اور شہریوں پر مبینہ طور پر اسلام آباد کے میزائل پروگرام سے متعلق اشیاء کی فراہمی کے الزام میں پابندیوں کے ردعمل میں اعلان کیا ہے کہ واشنگٹن کا یہ اقدام عدم پھیلاؤ کے معاہدوں کے بارے میں اس کے دوہرے رویے کو ظاہر کرتا ہے، اور پاکستان اسے سیاسی مقاصد کے تحت کیا جانے والا مخاصمانہ اقدام سمجھتا ہے۔

پاکستان کی وزارت خارجہ کی ترجمان، ممتاز زہرا بلوچ نے ایک بیان جاری کرکے کہا کہ پاکستان کے بیلسٹک میزائل پروگرام سے تعلق کے الزام میں امریکہ کی جانب سے تجارتی کمپنیوں پر پابندیاں عائد کرنے کا فیصلہ ایک جانبدارانہ اور سیاسی محرکات کے ساتھ کیا جانے والا اقدام ہے۔

یہ بھی پڑھیں : ایران پر پابندیاں ناکام تجربہ ہے، ایرانی وزیرخارجہ

بیان میں کہا گیا ہے کہ ماضی میں بھی مختلف تجارتی اداروں کو صرف بدگمانی کی وجہ سے پابندیوں کا شکار بنایا گیا ہے۔ پاکستان کی وزارت خارجہ کی ترجمان نے عالمی جوہری عدم پھیلاؤ کے بارے میں بحث میں امریکہ کے دوہرے رویے کو کھل کر تنقید کا نشانہ بنایا اور کہا کہ کچھ ممالک ایٹمی عدم پھیلاؤ کے معاہدوں کی پابندی کا دعویٰ کرتے ہیں، لیکن جب اپنے پسند کے ممالک کو جدید فوجی ٹیکنالوجی دینے کی بات آتی ہے تو وہ ان اصولوں کو نظر انداز کر دیتے ہیں۔