فلسطینی ریاست کے قیام پر اسپین کی میزبانی میں اہم ممالک کا اجلاس
ان کا کہنا تھا کہ اسرائیل اور دیگر ممالک خصوصاً سعودی عرب کے درمیان تعلقات کا قیام بھی اسرائیل کے لیے اہم ہے۔
شیعیت نیوز : میڈرڈ: اسپین اور ناروے کی حکومتوں نے کہا ہے کہ جمعے کو میڈرڈ میں کئی مسلمان اور یورپی ممالک کے وزرائے خارجہ کا اجلاس ہوگا، جہاں تنازع فلسطین کے دو ریاستی حل اسرائیل-فلسطین پر عمل درآمد کے حوالے سے تبادلہ خیال کیا جائے گا۔
خبر ایجنسی رائٹرز کی رپورٹ کے مطابق، اسپین کے وزیر خارجہ جوز مینوئل البیئرز کی میزبانی میں اجلاس ہوگا، جس میں ان کے یورپی ہم منصب، یورپی یونین کی خارجہ پالیسی کے سربراہ جوزف بوریل، اور غزہ کے لیے عرب-اسلامک کونٹیکٹ گروپ کے اراکین شریک ہوں گے۔
ناروے کے وزیر خارجہ ایسپن بارتھ ایڈی نے کہا کہ فلسطین کے وزیراعظم محمد مصطفیٰ بھی میڈرڈ اجلاس میں شرکت کریں گے۔
انہوں نے کہا کہ اجلاس میں جو بنیادی مسئلہ حل کرنا ہے وہ فلسطینی ریاست کا قیام یا اس کی طرف معقول راستہ تجویز کرنا اور فلسطینی اداروں کو مضبوط کرنا ہے۔
یہ بھی پڑھیں : پھانسی کی باتیں نہ کریں کیا اب ایک اور کو مارنا چاہتے ہیں؟سینیٹر علامہ راجہ ناصر عباس جعفری
ان کا کہنا تھا کہ اسرائیل اور دیگر ممالک خصوصاً سعودی عرب کے درمیان تعلقات کا قیام بھی اسرائیل کے لیے اہم ہے۔
یاد رہے کہ دو ریاستی حل میڈرڈ کانفرنس 1991 اور اوسلو معاہدہ 95-1991 میں عالمی برادری کی جانب سے تجویز کیا گیا تھا تاکہ دہائیوں سے جاری مسئلے کا بہتر حل نکالا جائے لیکن اس کے باوجود آج تک امن عمل مکمل نہیں ہوا۔
غزہ رابطہ گروپ عرب لیگ اور اسلامی تعاون تنظیم کا ایک اقدام ہے، جس میں مصر، سعودی عرب، قطر، اردن، انڈونیشیا، نائیجیریا اور ترکی شامل ہے۔
