غزہ کے علاقوں پر جارح صیہونی فوج کے حملے، دو سو دس فلسطینی شہید

شیعیت نیوز:صیہونی حکومت نے آج صبح مرکزي غزہ کے دیرالبلح علاقے پر وسیع حملے کئے ہیں- مرکزی غزہ کے النصیرات ، المغازی اور البریج کیمپوں پر بھی جارح صیہونی فوج نے بمباری کی ہے۔

ان حملوں میں اب تک دو دس فلسطینی شہید اور زخمی ہوچکے ہیں۔

ذرائع نے رپورٹ میں کہا ہے کہ اس علاقے میں شدید دھماکوں اور فائرنگ کی آوازیں سنی گئی ہیں۔

در ایں اثنا غزہ کی وزارت صحت نے اعلان کیا ہے کہ صیہونی حکومت نے گذشتہ چوبیس گھنٹوں کے دوران غزہ کے مختلف علاقوں پر پانچ مرحلے میں وحشیانہ حملے کرکے ستر افراد کو شہید اور ڈیڑھ سو سے زائد کو زخمی کردیا۔

غزہ کی وزارت صحت کے مطابق، نئے اعداد و شمار کے مطابق سات اکتوبر دوہزار تیئیس سے اب تک شہید ہونے والوں کی تعداد چھتیس ہزار آٹھ سو ایک جبکہ زخمیوں کی تعداد تراسی ہزار چھ سو اسی ہوگئی ہے۔

یہ بھی پڑھیں:اسرائیلی نمائندے کا رویہ قابل مذمت ہے، ترجمان اقوام متحدہ کا شدید ردعمل

خبری ذرائع نے غزہ کے مختلف علاقوں خاص طور پر النصیرات کیمپ میں شدید جھڑپیں ہونے اور صیہونی فوجیوں پر مجاہدین کے حملوں کی خبر دی ہے۔

غزہ پٹی کے وسط میں واقع شہر دیر البلح کے مشرق میں مزاحمتی گروہوں اور قابض فوج کے درمیان شدید جھڑپیں ہوئی ہیں۔

دوسری جانب فلسطین کی تحریک جہاد اسلامی کی عسکری شاخ سرایا القدس نے اعلان کیا ہے کہ اس نے دیر البلح کے مشرق میں واقع الباطون اسٹریٹ پر صیہونی فوجیوں کے اجتماع پر راکٹ سے حملہ کیا ہے۔

تحریک حماس کی عسکری شاخ شہید عزالدین القسام بریگیڈ نے بھی اعلان کیا ہے کہ اس نے غزہ کی پٹی کے جنوب میں رفح کے مشرق میں خفیہ کارروائی کرتے ہوئے صیہونی حکومت کے کئی فوجیوں کو ہلاک اور زخمی کردیا۔