امام محمد تقیؑ کی ترتیب دی گئی حکمت عملی کی مثال نہیں ملتی، علامہ ساجد نقوی

شیعیت نیوز : سربراہ شیعہ علماء کونسل پاکستان علامہ سید ساجد علی نقوی نے نویں امام حضرت امام محمد تقی علیہ السلام کے یوم شہادت کی مناسبت سے جاری پیغام میں کہا ہے کہ آپ علیہ السلام کو اپنے اجداد،آئمہ اطہار اور رسول اکرم ص کی تعلیمات کو اور مشن کو مختصر عرصہ کیلئے آگے بڑھانے کا موقع ملا۔

لیکن یہ مختصر عرصہ بھی تاریخ میں انمٹ نقوش رقم کر گیا اور ہر قسم کے سنگین حالات میں فریضہ امامت انتہائی ذمہ داری، حکمت عملی اور بصیرت کے ساتھ انجام دیا جس کے طفیل آج دنیا امامت کے فیوض و برکات سے گذشتہ کئی صدیوں سے فیض یاب ہورہی ہے۔

حضرت امام تقی علیہ السلام کا یہ فرمانا کہ "کلام کی زینت فصاحت، ایمان کی عدالت، عبادت کی سکون قلب، علم کی تواضع، عقل کی ادب، حلم کی کشادہ دلی، خوف خدا کی گریہ طویل اور نفس کی زینت ریاضت ہے”، درحقیقت عالم بشریت کے لئے ابدی رہنما اصول ہیں۔

یہ بھی پڑھیں : شہادت امام محمد تقی علیہ السلام کے موقع پر کاظمین سیاہ پوش

حضرت امام محمد تقیؑ نے جہاں امت مسلمہ کو قرآن کے الہی احکامات، رسول اکرم ص کی سیرت طیبہ اور آئمہ معصومین ع کے فرامین مقدسہ کی طرف متوجہ رکھا۔

یہ رہنمائی صرف اپنے حلقۂ ارادت تک نہیں بلکہ عام مسلمان سے لے کر اس وقت کے حکمرانوں تک سب کے لیے یکساں اور برابر تھی۔

یہی وجہ ہے کہ آپ علیہ السلام نے اپنے آباء و اجداد کی طرح امر بالمعروف اور نہی عن المنکر کا نبوی فریضہ انجام دیا۔

امام محمد تقی علیہ السلام نے امت مسلمہ کو تا قیامت رہبری و رہنمائی کا سامان بہم پہنچانے کے لیے جس انداز سے حکمت عملی ترتیب دی اور جس طرح حکمرانوں اور دین مخالف طبقات کی سازشوں کا مقابلہ فرمایا، اس کی مثال نہیں ملتی۔