شہید صدر کی تشییع میں عوام کی بھرپور شرکت طاقت کا پیغام تھی، رہبر معظم

شیعیت نیوز:رہبر معظم انقلاب اسلامی حضرت آیت اللہ خامنہ ای نے شہید رئیسی کے گھر پر حاضری دی اور ان کے اہل خانہ سے ملاقات کی۔

اس دوران شہید صدر کو اسلامی انقلاب کے شعار کا مظہر قرار دیتے ہوئے عوام کی جانب سے غیر معمولی اظہار عقیدت کو ایران کے حق میں دنیا کے لئے اہم پیغام جانا۔

اس ملاقات میں حجۃ الاسلام والمسلمین علم الہدی، شہید رئیسی کی اہلیہ محترمہ ڈاکٹر جمیلہ علم الہدی، اور بیٹیاں اور قریبی رشتہ دار موجود تھے۔

رہبر معظم انقلاب اسلامی نے شہید رئیسی کے فقدان کو ملک کے لئے ایک سنگین اور ناقابل تلافی نقصان قرار دیا۔

یہ بھی پڑھیں:رہبر معظم کی قیادت میں ترقی کا سفر جاری رہے گا، ترجمان ایرانی وزارت خارجہ

آیت اللہ خامنہ ای نے صدر مملکت کے جنازے میں لوگوں کی غیر معمولی شرکت کی طرف اشارہ کرتے ہوئے کہ جو غیر ملکی مہمانوں کی نگاہ میں بھی غیر معمولی اہمیت کی حامل تھی، اسے اسلامی جمہوریہ کے حق میں دنیا کے لیے ایک اہم پیغام قرار دیا کہ جس سے اسلامی جمہوریہ کی عوامی طاقت کا اظہار ہوا۔

یہ عوامی قوت ایرانی معاشرے اور قوم کی گہری جڑوں میں پیوست ہے۔

رہبر معظم انقلاب نے مزید کہا مرحوم صدر کی مخلصانہ خدمات صرف ان کی زندگی تک محدود نہیں ہیں بلکہ آقائے رئیسی نے اپنی وفات کے بعد بھی ملک کے لئے گراں قدر خدمات انجام دیں۔

آیت اللہ خامنہ ای نے کہا کہ یہ اجتماعات جو گریہ و زاری کے ساتھ ہوئے در اصل اسلامی انقلاب اور اس کے نعروں کے ساتھ عوام کے لگاؤ اور گہری وابستگی کی عکاسی کرتے ہیں۔

اس ملاقات کے اختتام پر رہبر معظم انقلاب نے حجۃ الاسلام المسلمین رئیسی کے لئے اللہ تعالیٰ سے مغفرت اور پسماندگان کے لئے صبر کی دعا کی۔