ترکی نے اسرائیل سے تمام تجارتی تعلقات منقطع کر دیئے

شیعیت نیوز:ترکی کی وزارت تجارت کا کہنا ہے کہ غزہ میں بدتر انسانی المیے کی وجہ سے ترکی اسرائیل سے تمام تجارتی تعلقات منقطع کرتا ہے۔

وزارت تجارت نے بیان جاری کرتے ہوئے کہا کہ ترکی اسرائیل سے کسی قسم کی درآمدات اور برآمدات نہیں کرے گا، غزہ میں جنگ بندی تک اسرائیل سے کوئی تجارت نہیں ہوگی۔

جب تک اسرائیلی حکومت انسانی امداد کو بغیر کسی رکاوٹ کے غزہ تک پہنچنے کی اجازت نہیں دیتی ترکی اپنے نئے اقدامات پر سختی سے عمل در آمد کرے گا۔

اس سے قبل ترکی کے وزیر خارجہ ہاکان فیدان نے جمعرات کے روز کہا تھا کہ ترکی عالمی عدالت انصاف میں اسرائیل کے خلاف جنوبی افریقہ کی نسل کشی کے مقدمے میں فریق بنے گا۔

یہ بھی پڑھیں:حماس کا اسرائیل کے فوجی اڈے پر راکٹ حملہ

جنوبی افریقہ کی جانب سے اسرائیل پر غزہ میں ریاستی نسل کشی کا الزام عائد کیے جانے کے بعد عالمی عدالت انصاف نے جنوری میں اسرائیل کو حکم دیا تھا کہ وہ نسل کشی کنونشن کے تحت آنے والے کسی بھی اقدام سے باز رہے اور اس بات کو یقینی بنائے کہ اس کی افواج فلسطینیوں کے خلاف نسل کشی نہ کریں۔

یاد رہے کہ بدھ کے روز کولمبیا کے صدر گستاو پیٹرو نے غزہ میں اسرائیلی اقدامات کی مخالفت کرتے ہوئے اسرائیل کے ساتھ سفارتی تعلقات منقطع کرنے کا اعلان کیا تھا۔

قبل ازیں متحدہ عرب امارات بھی اسرائیل سے سفارتی تعلقات منقطع کرنے کا اعلان کر چکا ہے جبکہ ایران نے بھی اسرائیل کی مدد کرنے پر امریکی اور برطانوی شخصیات پابندی لگا دی ہے۔

واضح رہے کہ غزہ میں 7 اکتوبر سے جاری اسرائیلی جارحیت میں اب تک 34 ہزار 596 افراد شہید جبکہ 77 ہزار 816 افراد زخمی ہوچکے ہیں۔

شہید ہونے والوں میں بڑی تعداد عورتوں اور بچوں کی ہے۔