پاکستان میں کوئی گڈ یا بیڈ طالبان نہیں ہوں گے،بلاول بھٹو
ہمارا ملک آج سخت مشکلات میں ہے، ملک آج ایک بار پھر خطرے میں ہےاگرکوئی ملک کےخلاف ہتھیار اٹھائے گا تو منہ توڑ جواب دیں گے
شیعیت نیوز: پاکستان پیپلز پارٹی (پی پی پی) کے چیئرمین بلاول بھٹو زرداری نے کہا ہے کہ دہشت گرد ایک بار پھر سر اٹھا رہے ہیں، کسی نے پاکستان کے خلاف ہتھیار اٹھایا تو منہ توڑ جواب دیا جائے گا۔
ملک کو نفرت اور تقسیم کی سیاست سے بچانا ہے تو شیر نہیں تیر پر مہر لگانی ہے جبکہ چوتھی بار وزیراعظم بننے کا خواب دیکھنے والے غلط فہمی میں ہیں۔
ملک کی سکیورٹی کی بات کرتے ہوئے چیئرمین پیپلزپارٹی نے کہا کہ پاکستان میں کوئی گڈ یا بیڈ طالبان نہیں ہوں گے، اگرکوئی ملک کےخلاف ہتھیار اٹھائے گا تو منہ توڑ جواب دیں گے۔
لیاقت باغ راولپنڈی میں جلسے سے خطاب کرتے ہوئے بلاول بھٹو زرداری نے کہا کہ ’میں اسی شہر میں موجود ہوں جہاں ذوالفقار علی بھٹو کو شہید کیا گیا، میں اسی شہر میں ہوں جہاں بےنظیر بھٹو نے اپنی آخری تقریر کی تھی‘
یہ بھی پڑھیں :صدر وفاق المدارس الشیعہ حافظ ریاض نجفی سے بلاول بھٹو زرداری کی ملاقات
انہوں نے کہا کہ ’ہمارا ملک آج سخت مشکلات میں ہے، ملک آج ایک بار پھر خطرے میں ہے، ہمارا معاشی معاہدہ عوام کو اپنا کھویا ہوا مقام دلائے گا، ہمارا معاشی معاہدہ عوام کو روٹی، کپڑا اور مکان دلائے گا، ہم ملک کو متحد کرکے ترقی یافتہ بنائیں گے۔
ان کا کہنا تھا کہ ’ملک کو صرف اور صرف پیپلز پارٹی چلا سکتی ہے، صرف پیپلز پارٹی سب کو ساتھ لے کر چل سکتی ہے، پیپلز پارٹی تقسیم کی سیاست کو ہمیشہ کے لیے دفن کردے گی، نفرت کی سیاست کو ہمیشہ کے لیے ختم کر دیں گے۔
