پنجاب پولیس کی اہم کارروائی ،تکفیری دہشت گرد پسپا

شیعیت نیوز:  پنجاب پولیس نے بین الصوبائی سرحدی علاقے سے صوبے میں داخلے کی کوشش ناکام بناتے ہوئے  دہشت گردوں کو پسپا ہونے پر مجبور کردیا۔

ڈیرہ غازی خان کے تھانہ وہوا کی سرحدی چوکی جھنگی پر دہشت گردوں نے رات کی تاریکی کا فائدہ اٹھا کر حملے کی کوشش کی۔

 پولیس کے مطابق کالعدم تنظیم کے 08 سے 10 دہشت گردوں نے حملہ کرنے کی کوشش کی۔

تاہم چوکی پر تعینات بہادر جوانوں نے جدید ترین تھرمل امیج کیمروں کی مدد سے دہشت گردوں کی نشاندہی کی اور بروقت کارروائی کی، جس پر دہشت گرد پسپا ہوکر فرار ہونے پر مجبور ہو گئے۔

آئی جی پنجاب ڈاکٹر عثمان انور نے اپنے ویڈیو پیغام میں بتایا کہ دہشت گردوں کے خلاف کارروائی کے موقع پر ایس ایچ او وہوا کی قیادت میں دوسری ٹیم بھی بیک اپ کے لیے فوری موقع پر پہنچی۔

یہ بھی پڑھیں:انتخابات کیلئے پنجاب پولیس کے پاس مطلوبہ نفری موجود نہ ہونے کا انکشاف

صوبے کی تمام سرحدی چوکیوں پر پولیس ٹیمیں شب و روز ہائی الرٹ ہوکر فرائض ادا کر رہی ہیں۔

آئی جی پنجاب ڈاکٹر عثمان انور نے بتایا کہ پولیس کے جانبازوں نے دہشت گردوں کو پسپائی اور بھاگنے پر مجبور کر دیا۔

صوبے کی تمام سرحدی چوکیوں پر پولیس ٹیمیں شب و روز ہائی الرٹ ہوکر فرائض ادا کر رہی ہیں اور جوانوں کا مورال بلند ہے۔

انہوں نے کہا کہ شہریوں کی جان و مال کے دشمن خطرناک دہشت گردوں کے خاتمے کے لیے پولیس پوری طرح تیار ہے۔

ملک دشمن عناصر، دہشت گردوں اور سفاک مجرمان کو کسی صورت صوبے میں داخل نہیں ہونے دیا جائے گا، دہشت گردوں کا ہر حملہ ناکام بنایا جائے گا۔