خون کے آخری قطرے تک فلسطینیوں کی حمایت جاری رکھیں گے،کوئٹہ میں آل پارٹیز کانفرنس

 شیعت نیوز: فلسطین فاونڈیشن پاکستان کوئٹہ چیپٹر کے زیر اہتمام کوئٹہ پریس کلب میں منعقدہ آل پارٹیز پریس کانفرنس سے خطاب کرتے ہوئے سیاسی و مذہبی جماعتوں کے قائدین نے کہا کہ غزہ پر جارحیت کا اصل ذمہ دار امریکہ ہے اور اسرائیل امریکہ کا آلہ کار ہے۔
انہوں نے کہا کہ امریکہ کو چاہئیے کہ غزہ پر فی الفور جارحیت کو بند کرے ۔

سیاسی و مذہبی جماعتوں کے قائدین نے عرب اور اسلامی دنیا کی حکومتوں کے اسرائیل کے ساتھ تعلقات پر تشویش کا اظہار کرتے ہوئے مطالبہ کیا کہ عرب و اسلامی ممالک کی حکومتیں غاصب اسرائیل کے ساتھ تعلقات منقطع کریں

اور جو مسلمان ممالک اسرائیل کو تیل اور گیس فراہم کر رہے ہیں وہ فی الفور تیل اور گیس کی سپلائی بند کردیں۔
مقررین کا کہنا تھا کہ غزہ کے لوگ بہت بڑی قربانی ایک بہت بڑے ہدف اور مقصد کے لئے دے رہے ہیں

اور ان قربانیوں کا نتیجہ بھی ایک بڑے مقصد کے ساتھ حاصل ہو گا اور آزادی فلسطین و القدس ان قربانیوں کا ہدف ہے۔

ان کا کہنا تھا کہ پاکستان کے عوام غزہ کے مظلوم عوام کے ساتھ ہیں ۔ پاکستانی عوام نے ہمیشہ فلسطینیوں کی حمایت کی ہے اور کرتے رہیں گے۔

انہوں نے عوام سے اپیل کی کہ گھروں کی عمارتوں سمیت محلوں، گاڑیوں اور موٹر سائیکلوں پر فلسطینی پرچم لہرائیں اور یکجہتی فلسطین مہم کو کامیاب بنانے میں کردار ادا کریں۔

انہوں نے غزہ میں امریکی سرپرستی میں جاری اسرائیلی جارحیت کی شدید مذمت کی اور عالمی برادری سے مطالبہ کیا کہ غزہ پر امریکی سرپرستی میں جاری اسرائیلی جارحیت کو رکوانے میں اپنا کردار ادا کرے۔

اس موقع پر علامہ مقصود علی ڈومکی، مرکزی رہنما مجلس وحدت مسلمین پاکستان و رہنما فلسطین فاؤنڈیشن بلوچستان علامہ محمد جمعہ اسدی ، مولانا نور علی ۔ امیر جمعیت جماعت اسلامی کوئٹہ محمد عالم  ایڈووکیٹ عبدالھادی کاکڑ چیئرمین گرین پاکستان پارٹی   مولانا شیخ ولایت حسین جعفری ،صوبائی نائب صدر مجلس وحدت مسلمین بلوچستان مفتی سنزر سعید ۔ رہنما جمعیت علمائے اسلام کوئٹہ ۔ سید عادل شاہ ۔ مجلس وحدت مسلمین کوئٹہ نے خطاب کیا۔