اربعین کے موقع پر خصوصی سیکورٹی پلان کامیاب، ایرانی کمانڈر احمد علی گودرزی

شیعیت نیوز: ایران کی بارڈر سیکورٹی فورس کے کمانڈر بریگیڈیئر احمد علی گودرزی نے اربعین کے موقع پر اپنے خصوصی سیکورٹی پلان کو مکمل طور سے کامیاب قرار دیا ہے۔

ایران کی بارڈر سیکورٹی فورس کے کمانڈر بریگیڈیئر احمد علی گودرزی نے عراق سے ملی ایران کی مہران سرحد کا دورہ کیا اور قریب سے زائرین کی آمد و رفت اور ان کے فراہم کی جانے والی سہولتوں اور وہاں نافذ کئے جانے والے خاص سیکورٹی پلان کا جائزہ لیا۔

اس موقع پر انہوں نے نامہ نگاروں سے بات چیت کرتے ہوئے کہا کہ اس سال کے اربعین سیکورٹی پلان کے تحت ہم عوام اور بالخصوص زائرینِ اربعین کی خدمت، اتحاد و بھائی چارے کے عظیم الشان جلووں کا نظارہ کر رہے ہیں۔

یہ بھی پڑھیں : ہمارے پاس لیزر سسٹم تک رسائی ہے،F35 کی شناخت اور اسے تباہ کرنے کی صلاحیت موجود ہے

بریگیڈیئر احمد علی گودرزی نے مزید کہا کہ دیار عشق عقیدت کی جانب جاتے وقت زائرین کرام کو ہمارے بارڈر سیکورٹی فورس کے جوان سب سے آخر میں رخصت کرتے ہیں اور پھر واپسی پر یہی لوگ ان کا سب سے پہلے خیرمقدم بھی کرتے ہیں اور بہت سے زائرین واپس ایران پہنچنے پر اس اسلامی سرزمین کی خاک کو چومتے ہیں۔

ایران کی بارڈر سکیورٹی فورس کے کمانڈر کا کہنا تھا کہ خوش قسمتی سے کئی مہینے پہلے ہی ایران اور عراق نے مل کر بہت سے لازمی سیاسی و سفارتی اقدامات انجام دیئے جس کے نتیجے میں عراق کے ساتھ سولہ سو زائد کلومیٹر کی مشترکہ سرحد ہونے کے باوجود اربعین کا خصوصی سکیورٹی پلان بحُسن و خوبی انجام پا رہا ہے اور پوری سرحد کو اس کے پاسبان زیر نظر لئے ہوئے ہیں۔

یاد رہے کہ بیس صفر کو حضرت امام حسین علیہ السلام کا چہلم ہے اور چند روز ہی شہدائے کربلا کے اربعین میں باقی رہ گئے ہیں اور اسی کےپیش نظر دنیا بھر سے دسیوں لاکھ زائرین زمینی اور ہوائی راستوں سے عراق پہنچ چکے ہیں۔

ارنا نیوز نے تازہ ترین اعداد و شمار کا حوالہ دیتے ہوئے بتایا ہے کہ ابتدائے صفر سے اب تک بیس لاکھ سے زائد زائرین ایران کی سرحدوں سے عراق میں داخل ہو چکے ہیں۔