مدارس دینیہ اسلامی مراکز، علم کے ساتھ روحانی بلندی بھی ضروری ہے، علامہ ریاض حسین نجفی

شیعیت نیوز: وفاق المدارس الشیعہ پاکستان کے صدر آیت اللہ حافظ سید ریاض حسین نجفی نے کہا ہے کہ مدارس دینیہ اسلامی مراکز ہیں، جہاں لاکھوں طلبہ علم دین حاصل کرتے ہیں مگر ان میں سے محنت کے ساتھ نامور بہت کم ہی بنتے ہیں۔

انہوں نے کہا کہ بین الاقوامی حوزہ ہائے علمیہ نجف اشرف اور مقدس المقدس میں مراجع عظام سے ہزاروں علماء تعلیم حاصل کرتے ہیں۔ ان میں سے بہت کم آگے آتے اور معاشرے میں محنت کے ساتھ معروف ہوتے ہیں۔

حال ہی میں رحلت فرمانے والے بزرگ عالم دین آیت اللہ شیخ محمد حسین نجفی رحمتہ اللہ علیہ مجتہد، مخلص اور متقی عالم دین تھے، جنہوں نے اپنی محنت اور اخلاص سے تبلیغ دین کی۔ اقوام متحدہ کی 500 بااثر مسلم شخصیات کی فہرست میں فقیہہ عالی قدر آیت اللہ سید علی سیستانی کے ساتھ آیت اللہ محمد حسین نجفی کا نام آیا تو انہیں خود بھی معلوم نہیں تھا۔

انہوں نے کہا کہ معاشرے میں مختلف مذاہب اور فرقے پائے جاتے ہیں، کوئی دیو بندی، شیعہ، اہلحدیث، بریلوی، کوئی چشتی قادری کہلواتا ہے مگر ہمیں خود کو صرف مسلمان کہلوانا چاہیے۔

یہ بھی پڑھیں : عراق میں امریکی فوجیوں کی مشکوک نقل و حرکت پر امریکہ کی توضیح

حافظ سید ریاض حسین نجفی نے کہا کہ امام حسین علیہ السلام، اسلام کیلئے نکلے تھے، کسی فرقے کے لیے نہیں۔ ہمیں خود کو مسلمان کہلانے پر فخر کرنا چاہیے کہ اسلام ہمارا دین ہے اور خاتم الانبیاء کے ہم امتی ہیں۔ قرآن ہماری کتاب اور رسول خدا کے جانشین آئمہ ہدیٰ ہمارے رہبر ہیں، امام حسین علیہ السلام کی عظمت بیان کرتے ہوئے ان کا کہنا تھا کہ سید الشہداء اپنے وقت کے بہت بڑے عالم مخلص اور متقی تھے، جنہوں نے اسلام کی خاطر اسلام کی خاطر مشکلات کو برداشت کیا اور اپنا سب کچھ قربان کر دیا۔

حافظ سید ریاض حسین نجفی نے متوجہ کیا کہ منبروں پر مجالس میں شہدائے کربلا کی عظمت اور مقصد کو صحیح طریقے سے بیان کیا جائے تو لوگ اسلام کی طرف مائل ہو کر مکتب اہلبیت قبول کر لیں، ہمیں قرآن و حدیث کے بیان سے منبر حسینی کی اصلاح کی ضرورت ہے۔

جامع علی مسجد حوزہ علمیہ جامعتہ المنتظر ماڈل ٹاون میں خطبہ جمعہ دیتے ہوئے حافظ ریاض نجفی نے کہا کہ لوگوں کی اکثریت گمراہ ہوتی ہے۔ بہت کم لوگ ہیں جو حق پر ہوتے ہیں۔ امیرالمومنین امام علی علیہ السلام کا فرمان گرامی ہے کہ شور شرابہ کرنیوالے زیادہ اور حق پر عمل کرنے والے بہت کم ہیں۔

انہوں نے کہا کہ ایک ہی باپ کی اولاد مختلف ہوتی ہے۔ ترقی صرف علم سے کی جا سکتی ہے، علم حاصل کیسے کرنا ہے۔ سورہ اقرا میں اللہ تعالیٰ نے طریقہ کار بتا دیا ہے۔

حافظ سید ریاض حسین نجفی کا کہنا تھا کہ علم سے ایجادات ہوتی ہیں۔ لیکن علم کے ساتھ روحانی بلندی بھی ضروری ہے جو انسان کو عظیم بناتی ہے۔ روحانی بلندی سے انسان اللہ کو بڑا سمجھتا ہے چونکہ ایسا عالم جانتا ہے کہ مجھے جو بھی رتبہ حاصل ہوا ہے، یہ کسی وقت بھی چھینا جا سکتا ہے۔ اس لئے علم حاصل کرنے والے انسان کو متقی اور مخلص ہونا چاہیے جو بہت مشکل کام ہے۔

حافظ ریاض نجفی نے کہا ہے کہ پہلے علمی مراکز مسلمانوں کے پاس ہوتے تھے مگر افسوس اب کفار، اور یہود و نصاریٰ اس پر قابض ہیں اور وہ ہمیں ڈکٹیٹ کرتے ہیں کہ علم حاصل کیسے کرنا ہے۔