جنین پناہ گزین کیمپ پر حملے کے خلاف جنگ میں ایک صہیونی فوجی جہنم واصل

شیعیت نیوز: قابض اسرائیلی فوج نے علی الصبح اعلان کیا ہے کہ مقبوضہ مغربی کنارے میں جنین پناہ گزین کیمپ میں شروع کی گئی کارروائی کے دوران ایک اسرائیلی فوجی مارا گیا ہے۔ دوسری طرف اسرائیلی فوج کی دہشت گردی کے نتیجے میں شہید ہونے والے فلسطینیوں کی تعداد 12 ہوگئی ہے جب کہ 120 شہری زخمی ہوئے ہیں۔

اسرائیلی فوج کے بیان میں کہا گیا ہے کہ کل  منگل کی شام  جنین پناہ گزین کیمپ میں آپریشن کے دوران ڈیوٹی پر موجود ایک نان کمیشنڈ افسر لائیو گولی لگنے سے مارا گیا۔

جنین پناہ گزین کیمپ میں فلسطینی مزاحمت کاروں کے ساتھ فائرنگ کے تبادلے کے دوران ایک صیہونی فوجی ہلاک اور ایک زخمی ہوگیا۔ یہ واقعہ اس وقت ہوا جب جب سنیما محلے اور کیمپ میں صیہونی قابض فوج کے ساتھ مسلح جھڑپیں ہوئیں۔

الجزیرہ نے نامعلوم ذرائع کے حوالے سے کیمپ میں مزاحمت کاروں کے ساتھ مسلح جھڑپوں کے دوران ایک صہیونی فوجی کے مارے جانے اور دوسرے کے زخمی ہونے کی تصدیق کی ہے۔

یہ بھی پڑھیں : جنین کیمپ مزاحمت کا قلعہ اور قابض حکومت کی آنکھ میں کانٹا بنے گا، حازم قاسم

صیہونی فوجی کے مارے جانے کی خبر شدید جھڑپوں کے بعد قابض فوج کے کیمپ سے اخلاء کے بعد سامنے آئی تھی۔

اسرائیلی افواج نے مقبوضہ مغربی کنارے میں 44 گھنٹے تک جاری رہنے والی برسوں کی سب سے بڑی فوجی کارروائیوں میں سے ایک کو انجام دینے کے بعد منگل کی شام دیر گئے فلسطینی شہر جنین خالی کردیا۔

اسرائیلی فوج کی گاڑیوں کے قافلے جنین سے نکلتے ہوئے دیکھے گئے جو کہ پیر کی صبح شروع ہونے والے اسرائیلی آپریشن کے خاتمے کا اشارہ تھا۔

فلسطینی میڈیا نے بتایا کہ شہر سے انخلاء کے دوران اسرائیلی فورسز کے ساتھ الگ الگ جھڑپیں ہوئیں۔

اسی حوالے سے فلسطینی وزارت صحت نے منگل اور بدھ کی درمیانی شب اعلان کیا کہ جنین میں ایک اور فلسطینی شہید ہوگیا جس کے بعد اسرائیلی کارروائی میں شہید ہونے والے فلسطینیوں کی تعداد 12 جبکہ زخمیوں کی تعداد 120 ہوچکی ہے۔