ایران نے دہشتگردی اور بیرونی طاقتوں کی تسلط پسندانہ مداخلت کا ڈٹ کر مقابلہ کیا، صدر رئیسی
شیعیت نیوز: شنگھائی تعاون تنظیم کے اجلاس سے خطاب کرتے ہوئے ایران کے صدر رئیسی نے کہا کہ ایران نے خطے میں امن و آشتی کو مستحکم بنانے میں اپنے بنیادی کردار کو ثابت کر دیا ہے۔
شنگھائی تعاون تنظیم کے ورچوئل سربراہی اجلاس سے خطاب میں ایران کے صدر سید ابراہیم رئیسی نے ایران کو مستقل رکنیت ملنے پر مبارکباد پیش کرتے ہوئے اس تنظیم کی عالمی اہمیت پر زور دیا اور کہا کہ ایران کی رکنیت تاریخ ساز ثابت ہو گی ۔
صدر مملکت نے ون روڈ ون بیلٹ اور شمال جنوب کوریڈور منصوبوں کی بھر پور حمایت کا اعلان کرتے ہوئے کہا کہ ایران اپنی جغرافیائی پوزیشن کے پیش نظر ان منصوبوں کی تکمیل میں بنیادی کردار ادا کر رہا ہے۔
یہ بھی پڑھیں : ایران فلسطینیوں کی مدد کی کسی بھی درخواست کی حمایت کرتا ہے، ایرانی مشن
سید ابراہیم رئیسی نے کہا کہ ایران نے گزشتہ دوعشروں کے دوران دہشت گردی، انتہا پسندی اور بیرونی طاقتوں کی تسلط پسندانہ مداخلت کا ڈٹ کر مقابلہ کیا ہے۔
انہوں نے کہا کہ ایران نے خطے میں امن و آشتی کو مستحکم بنانے میں اپنے بنیادی کردار کو ثابت کر دیا ہے۔
صدر مملکت نے کہا کہ ایران، دہشت گردی، انتہا پسندی اور بیرونی سازشوں کے خلاف مہم کے حوالے سے اپنے تجربات تنظیم کے رکن ممالک کے ساتھ شیئر کرنے کیلئے تیار ہے۔
واضح رہے کہ بھارت کی میزبانی میں شنگھائی تعاون تنظیم کا ورچوئل اجلاس آج منعقد ہوا جس میں بھارت اور پاکستان کے وزراء اعظم اور چین و روس کے صدور نے ایران کی مستقل رکنیت پر مبارکباد دی۔
