خضر عدنان کی شہادت سے مقاومت کو نیا حوصلہ ملا ہے، حماس ترجمان حازم قاسم

شیعیت نیوز: فلسطینی مزاحمتی تنظیم حماس کے ترجمان حازم قاسم نے کہا ہے کہ تحریک جہاد اسلامی کے اعلی رہنما کی شہادت کے بعد صہیونیوں کے خلاف مزاحمت کی نئی لہر پیدا ہوجائے گی۔

رپورٹ کے مطابق حماس کے ترجمان حازم قاسم شہید خضر عدنان کو مقاومتی پرچم کا علمبردار قرار دیتے ہوئے کہا کہ انہوں نے قید و بند کی صعوبتوں کے باوجود فلسطین کی آزادی کے بارے میں سمجھوتہ نہیں کیا۔

المیادین چینل سے گفتگو کرتے ہوئے حماس کے ترجمان حازم قاسم نے کہا کہ خضر عدنان کی شہادت فلسطینی مقاومت کی تاریخ کا حصہ بن جائے گی اور شہید کے خون سے مقاومت کے حملوں میں مزید تیزی آئے گی جس سے غاصب صہیونی حکومت لرز کر رہ جائے گی۔

یہ بھی پڑھیں : شیخ خضر عدنان کی شہادت پر انتقامی کارروائیوں کا سلسلہ شروع، 21 راکٹ داغے گئے

انہوں نے خضر عدنان کی شہادت کو مشکوک قرار دیتے ہوئے کہا کہ صہیونی حکومت نے کسی منصوبے کے تحت ان کو قتل کیا ہے۔ فلسطینی قوم ان کی شہادت پر صہیونیوں کو کبھی معاف نہیں کرے گی اور اسرائیل کو اس کا خمیازہ بھگتنا پڑے گا۔

حماس کے ترجمان حازم قاسم نے خضر عدنان کی شہادت کو انسانی حقوق کی عالمی تنظیموں کے لئے بھی لمحہ فکریہ قرار دیتے ہوئے کہا کہ صہیونی مظالم کے حوالے سے انسانی حقوق کی نام تنظیمیں مکمل خاموش ہیں جس سے ان کا حقیقی چہرہ کھل کر سامنے آتا ہے۔

دوسری جانب جہادی رہنما خضر عدنان کی شہادت کے بعد مغربی کنارے کے شہر نابلس میں فلسطینی مجاہدین اور صہیونی جارح افواج کے درمیان جھڑپیں شدت اختیار کررہی ہیں۔

صہیونی ڈرون طیارہ فلسطینی شہر نابلس کی حدود میں داخل ہوگیا تھا جس کو مجاہدین نے سرنگون کردیا۔ اس سے پہلے صہیونی جارح افواج نے نابلس شہر میں رہائشی مکان کو میزائل حملے میں تباہ کردیا تھا۔