عالمی یوم القدس کی وسیع ریلیاں امام خمینی کے افکار کے عالمگیر ہونے کی ترجمان ہے

شیعیت نیوز: ایران کی وزارت خارجہ کے ترجمان نے ایران اور دنیا کے مختلف ملکوں میں عالمی یوم القدس کی ریلیوں اور اجتماعات میں بھرپور شرکت کو مسئلہ فلسطین کے بارے میں امام خمینی رح کے افکار کے عالمگیر ہونے کی علامت قرار دیا۔

ایران کی وزارت خارجہ کے ترجمان ناصر کنعانی نے عالی یوم القدس کی ریلیوں میں وسیع عوامی شرکت کے بارے میں اپنے ایک ٹوئٹ میں کہا ہے کہ ایران اور دنیا کے مختلف ملکوں میں عالمی یوم القدس کی ریلیوں اور اجتماعات میں وسیع عوامی شرکت مسئلہ فلسطین کے بارے میں امام خمینی رح کے افکار کے عالمگیر ہونے کی دلیل ہے۔

انہوں نے کہا کہ غاصب صیہونی حکومت اس وقت ماضی سے کہیں زیادہ اضمحلال سے دوچار ہے اور فلسطین کی آزادی کا وقت پہلے سے کہیں زیادہ قریب آگیا ہے۔

قابل ذکر ہے کہ کل جعمہ چودہ اپریل کو ایران سمیت دنیا کے مختلف ملکوں میں عالمی یوم القدس کی ریلیاں نکالی گئیں جن میں عوام نے وسیع پیمانے پر شرکت کی اور فلسطینی امنگوں پر اپنی حمایت اور صیہونی حکومت سے اپنی نفرت و بیزاری کا اظہار کیا اور فلسطین اور بیت المقدس کی آزادی پر تاکید کی۔

یہ بھی پڑھیں : مجلس وحدت مسلمین اور آئی ایس او کی جانب سے ملک بھر میں 400 سے زائد مقامات پر القدس ریلیوں کا انعقاد

دوسری جانب ایران کی وزارت خارجہ نے ایک بیان جاری کرکے عالمی اداروں اور تنظیموں سے فلسطینی عوام کے حقوق کی حمایت اور صیہونی جرائم رکوانے کا مطالبہ کیا ہے۔

عالمی یوم القدس کے موقع پر جاری کیے جانے والے بیان میں ایران کی وزارت خارجہ نے کہا ہے کہ آج سرزمین فلسطین اور قدس شریف عالم اسلام کے اتحاد اور دنیا بھر کے مظلوموں اور حریت پسندوں کی حق طلبی کی علامت بن چکی ہے۔

ایران کی وزارت خارجہ کے بیان میں کہا گیا ہے کہ اس سال عالمی یوم القدس کے موقع پر لاکھوں کروڑوں انسان فلسطینیوں کی فریاد مظلومیت بلند کریں گے۔

بیان میں کہا گیا ہے کہ فلسطین کا مسئلہ بدستور عالم اسلام کا اولین مسئلہ ہے۔

اس سے پہلے ایران کی وزارت خارجہ کے ترجمان ناصر کنعانی نے کہا تھا کہ خطے میں طاقت کا توازن کافی عرصے پہلے ، صیہونی حکومت کے نقصان اور فلسطین کے حق میں تبدیل ہوگیا ہے۔

اپنے ایک ٹوئٹ میں ناصر کنعانی کا کہنا تھا کہ شہید قدس جنرل قاسم سلیمانی کا ورثہ ایک مضبوط استقامی محاذ کی شکل میں ہمارے سامنے ہے۔