سعودی اتحاد نے سقطری جزائر میں غیرقانونی فوجی اڈہ بنا لیا ہے، انصاراللہ یمن

شیعیت نیوز: انصاراللہ یمن نے سعودی عرب کو متنبہ کرتے ہوئے کہا ہے کہ اس نے بحرہند میں واقع جنوبی یمن کے علاقے میں سقطری جزائر میں سے ایک جزیرہ کو اپنا غیرقانونی فوجی اڈہ بنا لیا ہے۔

المسیرہ ٹی وی کی رپورٹ کے مطابق انصاراللہ یمن حکومت نے کہا ہے کہ ہم سعودی اتحاد کی جانب سے سقطری جزائر میں جزیرہ عبدالکوری کو فوجی اڈہ بنانے کی مذمت کرتے ہیں۔

یمنی وزارت خانے نے مزید کہا کہ سعودی اتحاد نے یمن کے بعض جزیروں اور ساحلوں پر قبضہ کر لیا ہے اور وہاں کے ماحولیاتی نظام کو تباہ کرنے کے علاوہ مقامی لوگوں کو وہاں سے نکال کر انہیں پناہ گزین بنا دیا ہے۔

انصاراللہ نے مزید کہا کہ متحدہ عرب امارات کی افواج حدیبو کے ائیرپورٹ پر پہنچی ہیں جہاں سےانہیں جزیرہ عبدالکوری منتقل کیا جائے گا۔

یاد رہے کہ سقطری بحر ہند میں 6 جزیروں پر مشتمل علاقہ ہے جو افریقہ کے سامنے خلیج عدن میں واقع ہیں۔

اگست 2020 میں آئی میڈیا رپورٹس کے مطابق متحدہ عرب امارات نے سقطری جزائر میں صیہونی ریاست کو جاسوسی کا اڈہ بنانے کےلئے جگہ فراہم کی تھی۔

یہ بھی پڑھیں : شام: حمص شہر پر صیہونیوں کی فضائی جارحیت، 5 فوجی اہلکار زخمی

دوسری جانب یمن کے خلاف آٹھ سال سے جاری جارحیت میں صنعتی اور تجارتی شعبے کو ایک سو سڑسٹھ ارب ڈالر کا نقصان پہنچا ہے۔

یمن کی نیشنل سالویشن حکومت کی وزارت صنعت و تجارت نے اتوار کے روز ایک رپورٹ میں اعلان کیا ہے کہ یمن کے خلاف آٹھ سال سے جاری سعودی اتحاد کی جارحیت میں صنعتی اور تجارتی شعبے کو ایک سو سڑسٹھ ارب ڈالر کا نقصان پہنچا ہے۔

المسیرہ ٹی وی کی رپورٹ کے مطابق یمن کی نیشنل سالویشن حکومت کی وزارت صنعت و تجارت نے اعلان کیا ہے کہ سعودی اتحاد کی جارحیت میں یمن کے نجی شعبوں کو بے تحاشہ نقصان پہنچا ہے جس کا تخمینہ پچہتر ارب ڈالر سے زائد کا لگایا جا رہا ہے ۔

رپورٹ کے مطابق سعودی اتحاد نے یمن کے خلاف جارحیت میں بارہ ہزار سے زائد تجارتی مراکز کو نشانہ بنایا جس میں بارہ ارب سے زائد ڈالر کا نقصان پہنچا۔

اس رپورٹ کے مطابق سات سو سے زائد مقامی بازار اور مارکٹیں بھی نشانہ بنیں جس میں پہنچنے والے نقصان کا اندازہ ایک ارب چار سو ملین سے زائد ڈالر لگایا گیا ہے۔