یمنی مسلح افواج کی بڑی جنگی مشقوں کا آغاز

شیعیت نیوز: یمنی مسلح افواج نے جارح سعودی اتحاد کی جانب سے جنگ مسلط کرنے کے نویں سال کی مناسبت سے بڑی جنگی مشقوں کا آغاز کیا ہے۔
یمنی نیوز ایجنسی سبا کی رپورٹ کے مطابق یمنی فوج نے اپنی بڑی جنگی مشقوں میں مختلف پہاڑی، صحرائی اور جنگلی اہداف کو ٹارگٹ بنانے کی مشقیں انجام دیں۔
رپورٹ کے مطابق تمام ملٹری یونٹس بشمول انفنٹری فورسز، بٹالین کے سربراہان اور ملٹری کورسز سے فارغ التحصیل ہونے والے گروپس اور یونٹس کے ساتھ ساتھ مختلف خصوصیات کی حامل سپورٹ فورسز نے بھی اس مشق میں حصہ لیا۔
یہ بھی پڑھیں : خلیج فارس تعاون کونسل کی جانب سے سعودی عرب اور ایران تعلقات کا خیرمقدم
تفصیلات کے مطابق یمنی مسلح افواج کی یہ جنگی مشق اینٹی آرمر یونٹس، انجینرنگ کور، ائیر ڈیفنس، ڈرون اور میزائل یونٹس کی ہم آھنگی سے کی گئی۔
رپورٹ میں بتایا گیا ہے کہ یمنی فوج کی یہ مشق مختلف اہداف کو نشانہ بنانے کےلئے کی گئی جن میں فرضی دشمن کے پہاڑی، صحرائی اور دوسرے علاقوں میں موجود اڈوں کو ہدف بنایا گیا۔
یمنی فوج کے وزیردفاع محمد ناصر العاطفی نے کہا کہ ملکی خودمختاری اور اس کے وسائل ہمارا قانونی حق ہے جس پر کوئی بات چیت ممکن نہیں اور دشمن اتحادی افواج کو ہماری طرف سے جاری کردہ انتباہ کو سنجیدگی سے لینا چاہیے کیونکہ یمنی عوام اپنی زمین اور سمندری علاقے میں غیر ملکی افواج کی موجودگی کو قبول نہیں کریں گے۔
انہوں نے کہا کہ اگر دشمن نے اپنے کرائے کی افواج سے جنگ جاری رکھی تو ہمارا ردعمل اب ان کےلئے حیران کن ہوگا اور اس کے بعد انہیں پشیمان ہونے کا فائدہ نہیں ہوگا۔
واضح رہے کہ سعودی عرب نے امریکہ ، متحدہ عرب امارات اور چند دوسرے ملکوں کے ساتھ ملکر مارچ دوہزار پندرہ میں یمن کے خلاف جارحیت اور اس ہمسایہ ملک کے محاصرے کا آغاز کیا تھا جو تاحال جاری ہے۔