اہم ترین خبریںلبنان

ایران-سعودی عرب تعلقات کی بحالی پر سید حسن نصر اللہ کا ردعمل

شیعیت نیوز: حزب اللہ کے سیکریٹری جنرل نے کہا کہ ایران-سعودی عرب کے تعلقات کی بحالی ایک اچھی پیشرفت ہے اور اگر اپنے معمول کی راہ پر چلتے رہیں تو خطے اور لبنان کے لیے نئے افق کھل سکتے ہیں۔

رپورٹ کے مطابق، حزب اللہ لبنان کے سیکریٹری جنرل سید حسن نصر اللہ نے آج حزب اللہ کے ایک اعلیٰ اہلکار’’حاج اسد محمود صغیر‘‘ (حاج صالح) کی تجلیل و تکریم کے لیے منعقد کی گئی ایک تقریب سے خطاب کرتے ہوئے ایران-سعودی عرب تعلقات کی بحالی پر اپنے رد عمل کا اظہار کیا۔

سید حسن نصر اللہ نے کہا کہ ایران اور سعودی عرب کے سفارتی تعلقات کی دوبارہ بحالی ایک اچھی پیش رفت ہے اور ہم اس پر خوش ہیں، کیونکہ ہمیں یقین ہے کہ یہ اقدام خطے کی اقوام کے مفاد میں ہے۔

انہوں نے مزید کہا کہ اگرایران-سعودی عرب کا باہمی معاہدہ اپنے صحیح انداز میں اور معمول کی راہ پر آگے بڑھے تو لبنان سمیت خطے کے لیے نئے افق کھول دے گا۔

حزب اللہ کے سیکریٹری جنرل نے لبنان میں جاری صدر کے انتخاب کے مسئلے پر بھی بات کی اور کہا کہ نامزدگی کا حق کسی مخصوص گروہ اور قبیلے تک محدود نہیں اور کوئی بھی نمائندہ اور کوئی بھی پارلیمانی پارٹی جسے چاہے نامزد کر سکتے ہیں۔ ہم کسی پر صدارتی امیدوار ملسط کرنا نہیں چاہتے بلکہ صدارت کے معاملے کو حل کرنا چاہتے ہیں۔

یہ بھی پڑھیں : ایران اور سعودی عرب تعلقات کی بحالی پر صیہونی حلقوں کا ردعمل

سید حسن نصر اللہ نے کہا کہ یہ معاہدہ علاقے میں ایک عظیم تبدیلی اور علاقے اور لبنان کے لئے نئے افق کے کھلنے کی نوید سناتا ہے۔ انہوں نے تہران ریاض تعلقات کو علاقائی ممالک اور ان کے اقوام کے حق میں قرار دیا۔

دوسری جانب لبنان کی عبوری حکومت کے وزیر خارجہ عبد اللہ بو حبیب نے تہران و ریاض کے مابین سفارتی تعلقات کی بحالی کو لے کر ہوئے معاہدے کا خیرمقدم کیا اور کہا کہ دونوں ممالک کے درمیان سفارتی سرگرمیوں کے آغاز اور سفارت خانوں کی بحالی سے مستقبل قریب میں تمام علاقائی ممالک کے لئے مثبت نتائج برآمد ہوں گے۔

لبنانی شیعوں کی مجلس اعلائے اسلامی کے نائب سربراہ شیخ علی خطیب نے بھی تہران ریاض معاہدے پر ردعمل ظاہر کرتے ہوئے امید ظاہر کی کہ یہ معاہدہ اسلامی و عرب دنیا میں اتحاد و ہمدلی کا باعث بنے گا اور عالم اسلام و عرب کے عوام کے لئے مثبت نتائج کا حامل ہوگا۔

متعلقہ مضامین

Back to top button