برادر پڑوسی ملک ایران کیجانب سے جام شفاء ہسپتال کوئٹہ کو مفت ادویات کی فراہمی

شیعیت نیوز: ہلال احمر ایران کی جانب سے کوئٹہ کے جام شفاء ہسپتال کو بڑی مقدار میں مفت ادوایات فراہم کی گئی۔ جمہوری اسلامی ایران کوئٹہ کے وائس قونصل جنرل فریدون پیر لورن اور قونصلیٹ آفیسر بہرام خادمیان نے آج کوئٹہ میں جام شفاء ہسپتال سیٹلائٹ ٹاؤن کا دورہ کیا اور ہلال احمر ایران کی طرف سے دی گئی ادویات جام شفاء ہسپتال انتظامیہ کے حوالے کیں۔ ہسپتال پہنچنے پر جام شفاء ہسپتال کے چیف ایگزیکٹو ڈاکٹر محمد اسحاق نے انہیں خوش آمدید کہا اور انہیں ہسپتال کے بارے میں تفصیلی بریفنگ دی۔ بریفنگ میں ڈاکٹر محمد اسحاق نے بتایا کہ جام شفاء ہسپتال 30 سال سے افغان مہاجرین سمیت دیگر افراد کو علاج معالجے کی سہولیات فراہم کر رہا ہے۔ جام شفاء ہسپتال میں آنے والے مریضوں کو ایمرجنسی سمیت تمام سہولیات مفت دی جاتی ہیں۔ جس میں مختلف امراض کا علاج اور ایمبولیس سمیت مختلف سہولیات شامل ہیں۔

یہ بھی پڑھیں: فوری انتقام،آئی ایس آئی کے دو افسران کا قاتل عمرنیازی کیفر کردار تک پہنچ گیا

انہوں نے بتایا کہ ہسپتال میں روزانہ 150 سے 200 مریضوں کو او پی ڈی میں چیک اپ کے بعد مفت ادویات فراہم کی جاتی ہیں۔ اس کے علاوہ تمام ٹیسٹ کی مفت سہولت بھی میسر ہے۔ ڈاکٹر محمد اسحاق نے ہلال احمر جمہوری اسلامی ایران کی جانب سے ادویات اور دیگر سامان دینے پر شکریہ ادا کیا۔ اس موقع پر بات چیت کرتے ہوئے جمہوری اسلامی ایران کوئٹہ کے وائس قونصل جنرل فریدون پیر لورن نے کہا کہ میڈیکل کا شعبہ ایک مقدس پیشہ ہے۔ جام شفاء ہسپتال میں غریب مریضوں کے علاج معالجے کیلئے ہلال احمر جمہوری اسلامی ایران کی جانب سے ادویات فراہم کی جارہی ہیں۔ انہوں نے کہا کہ غریب مریضوں کا علاج کرکے انہیں صحتیاب کرنا بھی عبادت ہے۔ مہنگائی کے اس دور میں جام شفاء ہسپتال ہلال احمر ایران کی جانب سے روزانہ سینکڑوں مریضوں کو مفت صحت کی سہولیات اور ادویات فراہم کر رہا ہے۔