ایرانی بحریہ جدید بحری جنگی ہیلی کاپٹروں کی رونمائی کرے گی، سربراہ بحریہ ایران

شیعیت نیوز: سربراہ بحریہ ایران نے مہر سے خصوصی گفتگو میں کہا کہ متعدد نئے بحری جنگی ہیلی کاپٹر تیار کیے گئے ہیں جن کی مناسب وقت میں رونمائی کی جائے گی۔

مہر خبر رساں ایجنسی کے نامہ نگار نے ایرانی فوج کی بحریہ کے سربراہ ریئر ایڈمرل شہرام ایرانی کے ساتھ ایک خصوصی گفتگو انجام دی۔ سربراہ بحریہ ایران کا کہنا تھا کہ ایران اپنی بحری صلاحیتوں کے پیش نظر سمندر ملک کی ترقی کا محور بن سکتا ہے۔

انہوں نے مزید کہا کہ ایران کے پاس سمندر کے ذریعے ترقی کرنے کا بہترین موقع ہے جبکہ مکران کی ساحلی پٹی اس ترقی کا گیٹ وے بن سکتی ہے۔

یہ بھی پڑھیں : ایران نے اصفہان میں فوجی ورکشاپ پر ڈرون حملہ ناکام بنا دیا، ایرانی وزارت دفاع

سربراہ بحریہ ایران نے کہا کہ سمندر رکھنا ایک طرح کی جیوپولیٹکل برتری اور امتیاز ہے، جس ملکوں کے پاس سمندر نہیں ہے وہ جیوپلیٹکل اعتبار سے گھٹن سے دوچار ہیں۔

انہوں نے یہ بھی کہا کہ ہمیں ایک نئی ایرانی اسلامی تہذیب کی تشکیل کے لئے سمندری صلاحتیوں کو استعمال کرنا ہوگا۔

سربراہ بحریہ ایران ریئر ایڈمرل ایرانی نے کہا کہ صوبہ سیستان و بلوچستان کے علاقے کنارک میں بین الاقوامی میری ٹائم سیکورٹی سینٹر قائم کیا گیا ہے اور اس مرکز سے سطح سمندر پر ہونے والی کسی بھی نقل و حرکت پر نظر رکھی جا سکتی ہے اور اگر کوئی بحری جہاز ہنگامی حالت میں ہو تو مرکز میں اس کی معلومات کی فوری نگرانی کی جاتی ہے اور فوری مدد بھیجی جاسکتی ہے۔

مہر کے نامہ نگار نے سوال کیا کہ کچھ نئے بحری ہیلی کاپٹروں کی رونمائی کا اعلان کیا گیا تھا، اس سلسلے میں کام کہاں تک پہنچا ہے؟ جس پر ایرانی بحریہ کے سربراہ نے کہا کہ بحریہ کے نئے جنگی ہیلی کاپٹرز تیار ہوچکے ہیں اور ان کو استعمال بھی کیا جاچکا ہے جبکہ ان کی رونمائی مناسب وقت پر کی جائے گی۔