فلسطینی مقاومت کا غزہ کی پٹی میں جدید میزائل تجربہ
شیعیت نیوز: فلسطین کی تحریک مقاومت کےمجاہدین نے غزہ کے ساحل پر اپنے ایک اور جدید میزائل کا تجربہ کیا ہے۔
العہد ویب سائٹ کی رپورٹ کے مطابق فلسطین کی تحریک مقاومت کے مجاہدین کی جانب سے یہ جدید میزائل تجربہ ، مزاحمتی گروہوں کی دفاعی توانائی بڑھانے کی غرض سے کیا گیا ہے۔
جدید میزائل تجربے کے دوران کئی میزائل سمندر کی طرف داغے گئے۔یہ تجربہ صہیونی حکومت کے ساتھ ممکنہ تصادم کے لیے مقاومت کی تیاری کو بڑھانے کے لیے کیا گیا تھا۔
صیہونی حکومت کی جانب سے مسلط کی جانے والی جنگوں میں خاص طور سے سن دو ہزار چودہ کے بعد فلسطین کے مزاحمتی گروہوں کی جانب سے مقبوضہ فلسطین کے مختلف شہروں خاص طور سے تل ابیب کو میزائل حملوں کا نشانہ بنایا گیا جس نے صیہونی حکام کی نیندیں اڑا رکھی ہیں۔
یہ بھی پڑھیں : تحریک مزاحمت کے مجاہدین کی کارروائیوں سے صیہونی فوجی خوف و ہراس میں مبتلا
فلسطینی تحریک مقاومت نے حالیہ برسوں میں اپنی میزائل توانائی کے علاوہ دیگر دفاعی شعبوں منجملہ ڈرون توانائی میں بھی خاطر خواہ اضافہ کیا ہے اور تحریک مزاحمت کے ڈرون طیاروں نے مقبوضہ فلسطین کے مختلف علاقوں کی فضا میں بارہا پروازیں انجام دی ہیں جس سے صیہونی حکام گہری تشویش میں مبتلا ہیں۔
تحریک مقاومت نے اپنی بحری کمانڈو کارروائی کو بھی تقویت پہنچائی ہے اس طرح سے فلسطین کے مزاحمتی گروہوں نے اپنی اس آمادگی کا اظہار کر دیا ہے کہ وہ غاصب صیہونی حکومت کی ہر طرح کی جارحیت کا مقابلہ کرنے اور منھ توڑ جوابی اقدام عمل میں لانے کے لئے تیار ہیں اور وہ اپنی دفاعی توانائی کو مسلسل بڑھاتے رہیں گے۔
خیال رہے کہ حالیہ برسوں میں غزہ کی پٹی میں فلسطینی مقاومتی گروپ اپنی فوجی قوتوں کو بڑھانے اور اپنی تیاری کو برقرار رکھنے کے لیے غزہ کے ساحل سے میزائل تجربات کر رہے ہیں۔حال ہی میں سیف القدس کی جنگ میں صہیونی حکومت کو حیرت میں ڈال کر مقاومت اپنے میزائلوں سے زیادہ تر مقبوضہ علاقوں کو نشانہ بنانے میں کامیاب رہی ہے۔
