یمن میں جنگ بندی کی خلاف ورزی پر جارح سعودی اتحاد کو سخت انتباہ

شیعیت نیوز: جارح سعودی اتحاد کی جانب سے یمن میں جنگ بندی کی خلاف ورزی کا سلسلہ بدستوری جاری ہے۔

المسیرہ ٹیلی ویژن کے مطابق جارح سعودی اتحاد کے ڈرون اور جاسوس طیاروں نے یمن کے صوبوں مآرب، تعز، جوف، صعدہ ، الحدیدہ، ضالع، حجہ اور سرحدی علاقوں پر پروازیں انجام دے کر اقوام متحدہ کی قائم کردہ جنگ بندی کی خلاف ورزی کی ہے۔

رپورٹ میں کہا گیا ہے کہ جارح سعودی اتحاد کے مسلح ڈرون طیاروں نے صوبہ تعز کے البرح اور صوبہ مآرب کے علاقے طلعہ میں یمنی فوج اور عوامی رضاکارفورس انصار اللہ کے ٹھکانوں کے ساتھ ساتھ، رہائشی علاقوں کو بھی اپنے حملوں کا نشانہ بنایا ہے۔

المسیرہ ٹیلی ویژن کا کہنا ہے کہ سعودی اتحاد کے فوجیوں نے مختلف صوبوں میں یمنی فوج اور عوامی رضاکار فورس کے مورچوں کے علاوہ الحدیدہ، تعز، مارب، حجہ اورصعدہ سمیت متعدد صوبوں میں رہائشی علاقوں پر گولہ باری بھی کی ہے۔

یہ بھی پڑھیں : کابل، مسجد صدیقیہ میں شدید دھماکہ، 30 نمازی شہید

سعودی اتحاد کی جانب سے یمن میں جنگ بندی کی خلاف ورزی کا ارتکاب ایسے وقت میں کیا جارہا ہے کہ جب اقوام متحدہ کے خصوصی ایلچی ہینس گرینڈن برگ نے، گزشتہ دنوں جنگ بندی میں دوسری بار دوماہ کی توسیع کا اعلان کیا تھا۔

یمن میں جنگ بندی کا آغاز دو اپریل سے ہوا تھا اور اب اس میں دو ستمبر تک کی توسیع کردی گئی ہے۔

اس سے قبل یمن کی اعلی سیاسی کونسل کے صدر مہدی المشاط نے خبردار کرتے ہوئے کہا تھا کہ سعودی اتحاد کی جانب سے بار بار خلاف ورزی کے سبب جنگ بندی تقریبا ختم ہوکر رہ گئی ہے۔

سعودی عرب نے مارچ دوہزار پندرہ میں متحدہ عرب امارات، امریکہ اور چند دیگر ملکوں کے ساتھ مل کر مغربی ایشیا کے غریب ترین اور عرب اسلامی ملک یمن کو جارحیت کا نشانہ بنا رکھا ہے۔

سات سال سے جاری اس غیر قانونی اور ظالمانہ جنگ کے نتیجے میں ہزاروں بے گناہ یمنی شہری شہید اور زخمی ہوچکے ہیں جبکہ کئی لاکھ لوگوں کو اپنا گھر بار چھوڑ نے پر مجبور ہونا پڑا ہے۔

اقوام متحدہ نے سعودی جارحیت کے نتیجے میں پیدا ہونے والی صورتحال کو دیکھتے ہوئے بحران یمن کو تاریخ کا بدترین انسانی المیہ قرار دیا ہے۔